BAKI, 27 noyabr. TELEQRAF
ABŞ-nin Luiziana ştatında edam cəzasına məhkum edilmiş kişi 27 il həbsdə qaldıqdan sonra işin yenidən gözdən keçirilməsi ilə əlaqədar girov müqabilində azad edilib.
Teleqraf xəbər verir ki, bu barədə “Associated Press” məlumat yayıb.
Söhbət 1998-ci ildə xüsusi qəddarlıqla törədilmiş qətldə ittiham olunan Cimmi Dankandan gedir. Məhkəmə hökmünə görə, o, sevgilisinin iki yaşlı qızını zorlayıb və boğaraq öldürüb. 2025-ci ilin aprelində məhkəmə hökmü etibarsız sayılıb. Hakim qərara alıb ki, qız təsadüfən boğulub və Dankanın bu işdə iştirakı ilə bağlı sübutlar tutarlı əsaslara malik olmayıb. Noyabrın 26-da o, 150 min dollarlıq girov müqabilində azad olunub, amma onun işi üzrə araşdırmalar Luiziana Ali Məhkəməsi tərəfindən davam etdirilir.
Müdafiə tərəfi sabiq məhkumun günahsız olduğunu iddia edir. Qızın anası əvvəllər Dankanın günahkar olduğuna inamını itirdiyini və qızının təsadüfən vannada boğulduğunu etiraf edib. İttiham tərəfi isə Dankanın günahkar olduğunu sübut etməyə çalışır və onun yenidən həbs olunmasını tələb edir.
Məlumata görə, 1973-cü ildən bu yana ABŞ-də ölüm hökmü almış 200-dən çox şəxs əfv edilib. Onlardan 12-si Luizianadandır və onların içində sonuncu şəxs 2016-cı ildə əfv olunub.
