Qvineya-Bisauda Prezident Aparatının Hərbi Departamentinin rəhbəri Denis N'Kanha bir qrup zabitə verdiyi açıqlamada ölkənin tam nəzarətinin ələ keçirildiyini elan etdi.
Bəyanatda davam edən seçki prosesinin dayandırılması və ölkə sərhədlərinin bağlanması barədə qərarların qəbul edildiyi qeyd olunub.

Bu arada, Fransada yerləşən Jeune Afrique xəbər saytı Prezident Umaro Sissoko Embalo ilə əlaqə saxladığını iddia edən bir məlumat dərc edib.

Məlumatda Embalonun ofisində saxlanıldığı və hadisənin arxasında Quru Qoşunları Rəisinin olduğu bildirilirdi.


Qvineya-Bisauda 23 noyabrda keçirilən parlament və prezident seçkilərində Embalo rəsmi nəticələr açıqlanmadan əvvəl öz komandası tərəfindən aparılan saymaya görə, səslərin 65 faizini aldığını iddia edib.

Embalonun ən güclü rəqibi, müstəqil namizəd Fernando Dias da Kosta da seçkilərdə qalib gəldiyini bildirib.

Umaro Sissoko Embalo əsas müxalifət lideri Dominqos Simyoş Pereyranın namizədliyinə mane olmaqda ittiham olunub.

Ölkənin ən görkəmli siyasi partiyalarından biri olan Qvineya və Kabo-Verde Afrika Müstəqillik Partiyasının (PAIGC) lideri Pereira, namizəd siyahısında yer tuta bilmədikdən sonra Dias da Kostanı dəstəklədiyini açıqladı.

Həm Embalo, həm də Pereira 2019-cu ildə Qvineya-Bisauda keçirilən prezident seçkilərində qələbə qazandıqlarını və bu, bir neçə ay davam edən siyasi böhrana səbəb olduğunu bildirdilər.

Qərbi Afrikada yerləşən və 1974-cü ildə Portuqaliyadan müstəqil olan Qvineya-Bisau dünyanın ən kasıb ölkələrindən biridir.

Bu kiçik Atlantik ölkəsi Latın Amerikasından Avropaya narkotik daşınmasında əsas rol oynayır.

Coğrafi mövqeyi və hüquqi boşluqları səbəbindən narkotik qaçaqmalçıları üçün əlverişli bir marşrut olan Qvineya-Bisau buna görə də "narko-dövlət" kimi də tanınır.

Cənubi Amerikadan birbaşa Qvineya-Bisauya və ya qonşu ölkələrə göndərilən narkotiklər daha sonra bölünərək ABŞ və Avropaya göndərilir.

aia.az
Tərcümə şöbəsi

• Nəzarət
• Əsgər
• Elan
• Qvineya-Bisauda