Mövsüm dəyişiklikləri ilə birlikdə öskürək şikayətləri artmağa davam edir. Öskürək orqanizmin tənəffüs yollarını qorumaq üçün verdiyi təbii refleks olsa da, uzun davam edən hallarda gündəlik həyatı əhəmiyyətli dərəcədə çətinləşdirə bilər. Bu vəziyyətdə ən çox müraciət edilən vasitələrdən biri isə öskürək siroplarıdır.
Pravda.az bildirir ki, öskürək siropları öskürəyin növünə görə seçilməlidir. Quru öskürək zamanı öskürəyi sakitləşdirən antitussiv siroplar istifadə olunur. Bəlğəmli öskürəkdə isə bəlğəmi yumşaldaq xaric edilməsini asanlaşdıran mukolitik və ekspektoran siroplar daha uyğundur.
Yanlış sirop seçimi ciddi fəsadlara gətirib çıxara bilər. Xüsusilə bəlğəmli öskürək zamanı öskürək kəsən siropların istifadəsi bəlğəmin tənəffüs yollarında toplanmasına və nəfəs darlığına səbəb ola bilər. Bundan əlavə, 2 yaşdan kiçik uşaqlara sirop yalnız həkim məsləhəti ilə verilməlidir.
Dozanın aşılması və ya uzunmüddətli, nəzarətsiz istifadə — yuxululuq, başgicəllənmə və digər yan təsirlərə yol aça bilər.
Xəbərdarlıq: Öskürək siropu yalnız öskürəyin növü müəyyən edildikdən sonra seçilməlidir.
Əminə Bayramova
