Demokrat.az portalından əldə olunan məlumata əsasən, ain.az xəbər verir.
“Son günlər müşahidə olunan yüksək hərarət, üşütmə, boğaz ağrısı, burun axıntısı və ümumi halsızlıqla keçən xəstəlik dalğası klinik mənzərəsinə görə daha çox mövsümi viral infeksiyanı xatırladır”. Bunu Demokrat.az-a açıqlamasında infeksionist həkim Nigar Əliyeva deyib.O deyib ki, hazırda belə simptomların qısa müddətdə çox sayda insanda görünməsi virus infeksiyasının sürətli yayılmasını göstərir:“Bu cür hallar adətən payız–qış keçidində immunitetin zəifləməsi, havada dövriyyədə olan respirator virusların çoxalması ilə əlaqələndirilir. Əlamətlərin sürətlə yayılması yeni infeksiyadan şübhə yaratsa da, hələlik bunu təsdiqləyən rəsmi elmi məlumat yoxdur. Viruslar mövsümə uyğun şəkildə mutasiya edə bildiyindən əhali arasında daha ağır keçid də müşahidə oluna bilər. Xəstələrin çoxunda eyni simptomların qeydə alınması isə respirator yoluxuculuğun yüksək olduğunu göstərir. Halsızlığın uzun sürməsi bədənin virusla mübarizəsinə işarə edir və bu dövrdə istirahət vacibdir. Hərarət 38,5-dən yuxarıdırsa və düşməyirsə, həkim nəzarəti mütləqdir. Profilaktika isə bu mərhələdə ən güclü müdafiədir”.Həkim bildirib ki, əllərin tez-tez yuyulması, izdihamlı məkanlardan mümkün qədər uzaq durmaq, maskadan istifadə etmək yoluxma riskini ciddi şəkildə azaldır:“C vitamini zəngin qidalanma, isti maye qəbulu, yuxu rejimi və evin havalandırılması immuniteti gücləndirir. Özünü pis hiss edən şəxslərin evdə qalması və başqaları ilə təmasdan qaçması yoluxmanın qarşısının alınmasında ən təsirli addımdır. Antibiotik yalnız bakterioloji ağırlaşma varsa istifadə olunmalı, özbaşına qəbul edilməməlidir. Bu tip viruslar nə qədər sürətli yayılırsa, bir o qədər də tez sönür, lakin ehtiyatsızlıq onların yeni dalğa yaratmasına səbəb ola bilər. İndiki mərhələdə ən vacib məsələ panikadan uzaq durmaq, simptomlar ağırlaşdıqda isə tibbi yardıma vaxtında müraciət etməkdir”.Leyla Turan
Demokrat.az
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
