Krasnodar diyarının Arbitraj Məhkəməsi Baş Prokurorluğun iddiasını təmin edərək Azərbaycan əsilli Şahlar Novruzovla bağlı bir sıra aktivlərin dövlət mülkiyyətinə qaytarılması barədə qərar çıxarıb.
Ölkə.az “kommersant"a istinadən xəbər verir ki, Tuapse Dəniz Ticarət Limanı (TMCP) MMC və TMCP Enterprise MMC-nin nizamnamə kapitalında 100% pay Rusiyaya verilib. “Temryuk” Dəniz Ötürmə Terminalı və “Dar Fruit” MMC-nin aktivləri də eyni zamanda dövlətə keçirilib.
Novruzovdan başqa, işdə təqsirləndirilən şəxslər arasında aktivlərin hazırkı sahiblərindən olan iş adamı Oleq Basin və Britaniyanın Virciniya adalarında qeydiyyatdan keçmiş Vonixel Limited şirkəti də var.
Nəzarət orqanının məlumatına görə, 1994-cü ildən başlayaraq qeyri-qanuni əməliyyatlar baş verib və nəticədə Tuapse limanındakı estakada və bir sıra digər obyektlər bu sahiblərin nəzarətinə keçib.
Prokurorluq əmlakın qanunsuz olaraq dövlət mülkiyyətindən çıxarıldığını və ölkənin təhlükəsizliyi üçün strateji əhəmiyyət kəsb etdiyini iddia edir. Bütün əməliyyatlar etibarsız elan edilib.
TMCP və TMCP Enterprise konteynerlərdə idxal olunan yüklərin, ilk növbədə, Türkiyədən meyvə və tərəvəz məhsullarının qəbulu üzrə ixtisaslaşıb.
Şahlar Novruzov hazırda külli miqdarda dələduzluq işi ilə bağlı həbsdədir.
Qeyd edək ki, Krasnodarda “Old Baku Cafe” MMC və “Dar Fruit” MMC-nin direktoru, “Köhnə Bakı” restoranının və Tuapse yükdaşıma terminalının sahibi Şahlar Novruzov Azərbaycan diasporunun tanınmış simalarından biridir. Rusiya məhkəməsi Novruzovu külli miqdarda dələduzluğa cəhddə ittiham edərək 26 sentyabr 2023-cü ildə barəsində həbs qətimkan tədbiri seçib.
Mürtəza
