Dekabr ayının ortalarında Azərbaycan Xalq Partiyasının (AXP) qurultayı keçiriləcək.
Bunu “Yeni Sabah”a açıqlamasında təşkilatın keçmiş sədri Pənah Hüseyn deyib.
Onun sözlərinə görə, hazırda AXP-yə Qiyas Sadıqov rəhbərlik edir: “Partiya sədri səlahiyyətlərinin icrasını qanunvericiliyə uyğun şəkildə müavinim Qiyas Sadıqova həvalə olunub. Amma partiyanın hüquqi səlahiyyətli şəxsi yenə də mənəm”.
P.Hüseyn bildirib ki, partiyanın yeni sədrinin kim olmasına qurultay qərar verəcək:
“Biz qurultaya hazırlaşırıq. Qurultayda yeni sədr seçilərsə, həmin şəxs partiya rəhbəri olacaq. Bizim qurultayla bağlı müəyyən etdiyimiz tarix dekabr ayının ortalarıdır. Partiyanın İdarə Heyəti keçən il qərar qəbul etmişdi ki, 2025-ci ilin sonunadək qurultay keçirilsin. Mənim bugünkü namizədim Qiyas Sadıqovdur”.
Xatırladaq ki, Azərbaycanın sabiq Baş naziri, tanınmış ictimai-siyasi xadim Pənah Hüseyn bu ilin iyununda AXP sədrliyindən istefa verib.
Nazim Hacıyev
Telegram kanalımız
