Cenevrə danışıqlarında iştirak edən Ukrayna nümayəndə heyəti amerikalı həmkarlarına Ukrayna böhranının həlli planının yeni versiyasının milli maraqlara uyğun olduğunu təsdiqləyiblər.
Musavat.com xəbər verir ki, bu, danışıqlarınj yekununa dair Ağ Ev tərəfindən yayılan ABŞ-Ukrayna birgə bəyanatında qeyd olunub: "Ukrayna nümayəndələri bildiriblər ki, bu gün təqdim olunan dəyişikliklərə və dəqiqləşdirmələrə əsasən, mövcud layihənin onların milli maraqlarını əks etdirdiyinə və həm qısa, həm də uzunmüddətli perspektivdə Ukraynanın təhlükəsizliyini təmin etmək üçün etibarlı və mümkün mexanizmlər təqdim etdiyinə inanırlar.
Ukrayna nümayəndə heyəti görüş zamanı bütün əsas narahatlıqlarının - təhlükəsizlik zəmanətləri, uzunmüddətli iqtisadi inkişaf, infrastrukturun qorunması, naviqasiya azadlığı və siyasi suverenliyin - ətraflı şəkildə müzakirə olunduğunu təsdiqləyib".
ABŞ nümayəndə heyəti öz növbəsində bu məsləhətləşmələrin məqsədinin "davamlı və tətbiq oluna bilən sülh" yaratmaq olduğunu vurğulayıb: "Tərəflər bir daha təsdiqləyiblər ki, gələcəkdə hər hansı bir razılaşma Ukraynanın suverenliyinə tam hörmət etməli və davamlı və ədalətli sülhü təmin etməlidir".
Danışıqlardan sonra tərəflər sülh üçün yenilənmiş və təkmilləşdirilmiş çərçivə sənədi hazırlayıblar: “Ukrayna nümayəndə heyəti müharibəyə son qoymaq və insanların həyatını xilas etmək üçün göstərdikləri sarsılmaz öhdəlik və yorulmaz səylərə görə bir daha ABŞ-a, xüsusən də şəxsən Prezident Donald Trampa minnətdarlığını bildirib”.
Ukrayna və ABŞ yaxın günlərdə birgə təkliflər üzərində intensiv işi davam etdirmək barədə razılığa gəliblər.
Avropalı tərəfdaşlarla da sıx əlaqə saxlanılacaq.
Bəyanatda qeyd olunur ki, bu çərçivə sənədi ilə bağlı yekun qərarlar Ukrayna və ABŞ prezidentləri tərəfindən veriləcək: "Hər iki tərəf Ukraynanın təhlükəsizliyini, sabitliyini və bərpasını təmin edəcək sülhə nail olmaq üçün birgə işləməyə davam etməyə hazır olduqlarını təsdiqləyiblər".
Musavat.com
