Şəki Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Fərəc Nəsibzadənin (adı, soyadı şərtidir) cinayət işi üzrə məhkəmə istintaqı başa çatıb.
Pravda.az-ın əldə etdiyi məlumata görə, hakim Günay Aşurovanın sədrliyi ilə keçirilən prosesdə hökm oxunub.
Məhkəmənin hökmü ona şərti cəza verilib.
İttihama görə, hadisə 26 mart 2025-ci il tarixdə, saat 11 radələrində Şəki şəhərində qeydə alınıb.
Belə ki, Fərəc Nəsibzadə ilə sabiq sinif yoldaşı zərərçəkmiş Mansır Tağıyev (adı, soyadı şərtidir) arasında şəxsi münasibətlər zəminində mübahisə yaranıb. Mübahisəyə səbəb zərərçəkmiş şəxsin təqsirləndirilən şəxsin sinif yoldaşına “Instagram” sosial şəbəkəsindəki səhifəsinə təqib göndərməsinə irad tutması, onunla münasibət saxlamamasını tələb etməsi, habelə nalayiq ifadələr işlədib yumruqla vurması olub.
Bundan qisas almaq və zərərçəkmişi üzr istəməyə məcbur etmək məqsədi ilə Fərəc həmin gün onu görüşə çağırıb. Eyni gün saat 13 radələrində Şəki şəhəri, Sarabski küçəsində görüşdükdən sonra onlar birlikdə küçədə yerləşən keçmiş gübrə zavodunun ərazisindəki “üç turba” kimi tanınan köhnə tikilinin həyətinə gediblər. Orada təqsirləndirilən şəxs Mansırdan üzr istəməsini tələb edib, lakin o, imtina etdiyindən aralarında yenidən mübahisə yaranıb. Mübahisə zamanı Fərəc əvvəlcədən yaşadığı evdən götürdüyü və üzərində gəzdirdiyi mətbəx bıçağı ilə zərərçəkmiş şəxsin qarın nahiyəsinə qəsdən bir zərbə vurub. Bu zərbə nəticəsində qaraciyərin, mədəaltı vəzin, diafraqmanın və mədənin zədələnməsi ilə qarın boşluğuna nüfuz edən bir ədəd deşilmiş-kəsilmiş yara xəsarəti yaranıb.
Hadisədən sonra Fərəc Nəsibzadə saxlanılaraq cinayət məsuliyyətinə cəlb edilib.
Qeyd: Hər iki şəxs 10-cu sinfində oxuyur.
Kamal Məmmədov
