Rusiya ordusu Pokrovsk müdafiə xəttini yarmaqda çətinlik çəkir və şəhəri dolanaraq irəliləməyə cəhd edir.
Bu barədə məlumatı “Vostok” qoşun qruplaşması yayıb. Qruplaşmanın bildirdiyinə görə, Pokrovsk–Mirnoqrad aqlomerasiya istiqamətində çox sayda Rusiya bölməsi cəmləşib və həmin istiqamətdə aktivlik davam edir.
Məlumata əsasən, Pokrovskda Ukraynanın müdafiə qüvvələri Quru Qoşunları, Desant-hücum birləşmələri və hücum polklarının iştirakı ilə axtarış-hücum əməliyyatlarını sürdürür.
“Vostok”un məlumatında qeyd olunur ki, şəhərin şimal hissəsində Ukrayna qüvvələri mühüm mövqeləri qoruyub saxlayır və dəmir yolunun cənubundakı ərazilərə nəzarəti davam etdirir.
Rusiya tərəfinin kiçik qruplarla Qrişino kəndinə çıxaraq Pokrovsku yan tərəfdən keçmək cəhdləri isə uğursuzluqla nəticələnib və bu qruplar məhv edilib. Mirnoqrad istiqamətində də Rusiya hücum qruplarının irəliləmə cəhdləri davam edir, lakin Ukrayna müdafiə qüvvələri bu cəhdləri vaxtında aşkara çıxarıb mövqelərini saxlaya bilir.
//Musavat.com
