BAKI, 22 noyabr. TELEQRAF
“Hansısa sülh planı zorla Ukraynaya qəbul etdirilə bilməz”.
Teleqraf xəbər verir ki, bunu Polşa Prezidenti Karol Navrotski ABŞ-nin Ukrayna Prezidenti Volodimir Zelenskiyə Rusiyaya ciddi güzəştləri əhatə edən sülh planı təqdim etməsi barədə danışarkən deyib.
Polşa lideri vurğulayıb ki, istənilən danışıqlarda əsas qərarverici səs məhz Kiyevə aid olmalıdır:
“Ukrayna məhz Putinin cinayətkar hərbi təcavüzünün qurbanı olub. Ukraynalılar sülh danışıqlarında əsas söz sahibi olmalıdır”.
Karol Navrotski əlavə edib ki, sülh aqressorun strateji məqsədlərinin həyata keçirilməsi ilə əldə edilə bilməz: “Aqressor isə Rusiyadır, hələ də elə qalır”.
ABŞ tərəfindən hazırlanmış 28 maddəli plan Ukraynanın ərazi güzəştləri ilə razılaşması, hərbi imkanlarını məhdudlaşdırması və NATO-ya üzvlük səylərindən imtina etməsini nəzərdə tutur. Sənəd Rusiyanı qane etməyə biləcək bəzi maddələr də ehtiva edir, məsələn, ondan işğal olunmuş ərazilərin bir qismini tərk etməsi tələb olunur.
