Ermənistan vətəndaş cəmiyyəti nümayəndələrinin Bakıya səfəri regionda formalaşan yeni siyasi atmosferin mühüm elementlərindən biri kimi dəyərləndirilir. Maraqlıdır, bu səfərin diplomatik və ya siyasi əhəmiyyəti nədir?
Ədalət Partiyasının sədri Mütəllim Rəhimli KONKRET.az-a açıqlamasında bildirib ki, bu təşəbbüs Azərbaycan–Ermənistan münasibətlərində etimadın yaradılması və sülhün inkişafı baxımından ciddi önəm daşıyır.
“Hər iki dövlət hazırda vətəndaş cəmiyyəti formatında dialoqa xüsusi diqqət ayırır. Bu cür qarşılıqlı səfərlər böyük ehtimalla Azərbaycan Prezidentinin və Ermənistan Baş nazirinin avqust ayında ABŞ prezidenti Donald Trampın vasitəçiliyi ilə Vaşinqtonda keçirilən görüşündə əldə edilmiş razılaşmalarının tərkib hissəsidir”.
Politoloq vurğulayır ki, nundan əvvəl Azərbaycanın vətəndaş cəmiyyətinin nümayəndələri Ermənistanda səfərdə olublar.
“Səfər çərçivəsində Yerevanda bir sıra görüşlər keçirib, müzakirələr aparıblar. İndi isə Ermənistanı təmsil edən vətəndaş cəmiyyətinin üzvləri Bakıya gəlir. Ermənistanda beyin mərkəzinin nümayəndələri olan şəxslərin səfərinin məqsədi iki ölkə arasında anlaşma yaradılmasına köməklik etməkdir. Onlar qayıtdıqdan sonra Ermənistan cəmiyyəti üçün vacib idealarla çıxış edəcəklər”.
M.Rəhimli əlavə edir ki, siyasi qurumların, ictimai təşkilatların, medianın fəaliyyəti üçün zəruri ideyalar verərək, məntiqi mühakimələr ortaya qoyacaqlar.
“Bu isə Ermənistan cəmiyyətində yeni düşüncə formalaşdırmaq deməkdir. Ermənistanın beyin mərkəzinin nümayəndələrinin səfəri hökumət üçün də yeni çağırışlar formalaşdıra bilər. Beləliklə, bu səfər Ermənistan hakimiyyəti ilə erməni xalqının Azərbaycana qarşı obyektiv münasibətinin formalaşmasına xidmət göstərəcək. Bu isə nəticədə sülh prosesinin irəli aparılması və ona dəstəkdir”.
Müşviq Tofiqoğlu
KONKRET.az
