BAKI, 21 noyabr. TELEQRAF
“Robert Köçəryan və Serj Sərkisyan, eləcə də həmin dövrdə dövlətin siyasi fasadını təşkil edən siyasi qüvvələrin siyasətlə məşğul olması qanunla qadağan edilməlidir, partiyaları isə buraxılmalıdır”.
Teleqraf xəbər verir ki, bunu Ermənistanın müxalif “Respublika Naminə” partiyasının sədr müavini Ruben Mehrabyan deyib.
Siyasətçi bildirib ki, bu mövzuda Baş nazir Nikol Paşinyanın yanaşmasını dəstəkləyir, Robert Köçəryan və Serj Sərkisyanın seçkilərə qatılmamasının tərəfdarıdır:
“Başqa variant görmürəm, çünki onların yenidən seçkilərə gətirilməsi erməni xalqına qarşı ədalətsizlik olardı”.
Baş nazir Nikol Paşinyan dünən bəyan edib ki, 2026-cı il parlament seçkilərinin nəticəsində ölkəni tələyə salmış və uzun illər orada saxlamış keçmiş dövrün bütün siyasi elitası siyasi meydandan kənarlaşdırılmalı və artıq siyasətdə yer almamalıdır. Ermənistan rəhbəri seçkilərin yekun nəticəsində belə də olacağını vurğulayıb.
