Yeni qəbul edilmiş dövlət standartına əsasən, bundan sonra nəqliyyat vasitələrinə veriləcək dövlət qeydiyyat nişanlarında rəqəm və hərflər arasında defis işarəsi istifadə olunmayacaq. Bu dəyişiklik yalnız yeni hazırlanacaq nömrələrə şamil ediləcək. Maraqlıdır, bu standartın qüvvəyə minməsi sürücülük vəsiqəsi, qeydiyyat prosesləri və nəqliyyat vasitələrinin texniki baxışına təsir edəcəkmi?
Mövzu ilə bağlı KONKRET.az-a açıqlama verən nəqliyyat məsələləri üzrə ekspert Yasin Mustafayev bildirib ki, defisin ləğvi sürücülük vəsiqəsi, qeydiyyat və digər prosedurlara heç bir təsir göstərməyəcək:
“Defisi ləğv edirlər. Kim yeni nömrə alsa, defissiz olacaq. Çiplərdə də eyni proses olmuşdu – əvvəl çip yox idi, sonra əlavə etdilər, daha sonra yenidən ləğv olundu. Bu dəyişikliklər zəruri qaydada aparılır və digər sənədlərə aidiyyəti yoxdur.”
Ekspertin sözlərinə görə, nəqliyyat vasitələrinin qeydiyyatı, sürücülük vəsiqəsi prosedurları və texniki baxış prosesi əvvəlki qaydada davam edəcək. Sadəcə olaraq, yeni nömrə nişanı alan sürücülərin nömrəsində defis işarəsi yer almayacaq:
“Proseslər əvvəlki kimi gedəcək. Sadəcə nömrə dəyişdikcə o defislər artıq tətbiq olunmayacaq.”
Beləliklə, yeni standart yalnız dövlət qeydiyyat nişanlarının dizaynına aiddir və digər sahələrdə heç bir dəyişiklik yaratmır.
Aynurə İsmayıl
KONKRET.az
