Venesuelanın vitse-prezidenti Delcy Rodriges ABŞ-ın ölkəni 51-ci ştata çevirmək niyyətində olduğunu iddia edərək Vaşinqtonun regiondakı hərbi fəallığını “təhdid” kimi qiymətləndirib və Venesuelanın müstəqilliyindən heç vaxt imtina etməyəcəyini bildirib.
Editor.az xəbər verir ki, Karakasda keçirilən Milli Tarix Mükafatı mərasimində çıxış edən Rodriges ABŞ-ın Karib hövzəsindəki hərbi fəaliyyətini dəyərləndirərək bunun Venesuela üçün ciddi təhlükə yaratdığını qeyd edib.
“Biz müstəqil respublika olaraq qalacağıq. Heç vaxt başqa ölkənin tərkibinə daxil olmayacağıq. Xalqımız bir ovuc satqının və ölkəni ABŞ-ın 51-ci ştatına çevirməyi vəd edən bir qadının (müxalifət lideri Mariya Korina Maçado) göstərişlərinə boyun əyməyəcək. Xalqımız siyasi rəhbərlikdə olmasa belə, heç vaxt mübarizədən çəkilməyib və gələcəyinə olan ümidini itirməyib. Biz təslim olmayan bir millətik”, – deyə Rodriges bildirib.
Venesuelanın daxili işlər naziri Diosdado Kabello isə mümkün işğal təhlükəsinə qarşı hazırlıqların davam etdiyini vurğulayıb:
“Küçədə kiməsə yardım lazım olarsa, biz orada olacağıq. Təbii və ya texnogen fəlakət zamanı da xalqımızın yanındayıq. Kim ölkəmizi işğal etməyin asan olduğunu düşünürsə, bilsin ki, biz onların qarşısında dayanacağıq”.
// Gülnarə Abasova, Editor.az
