Bitcoin, Tramp administrasiyasının kriptovalyutalara dair müsbət mövqeyinə yönəlik həyəcanın azalması və qlobal bazarlarda riskdən qaçış meylinin artması fonunda dəyər itirməyə davam edir.
Marja xəbər verir ki, Bitcoin-in qiymətində ilin əvvəlindən etibarən baş vermiş 30 faizlik artım tamamilə silinib. Bazarlarda, Tramp administrasiyasının kripto aktivlərə münasibətdə gözlənilən müsbət yanaşmasının zəifləməsi satış təzyiqini artırıb.
Lider kriptovalyuta bazar günü 93 min 714 dollardan aşağı düşərək, ötən ilin sonunda müşahidə olunan bağlanış səviyyəsindən də aşağı düşüb. Bitcoin-in qiyməti 6 oktyabrda 126 min 251 dollara çataraq tarixi ən yüksək səviyyəsini görmüşdü. Cəmi dörd gün sonra Trampın tariflərlə bağlı gözlənilməz açıqlamaları qlobal bazarları silkələdiyi üçün eniş trendinə girmişdi.
Bitcoin bazar ertəsi günü itkilərinin bir qismini kompensasiya edərək 94 min 869 dollar səviyyəsində ticarət olunub.
Bitwise Asset Management-in investisiya direktoru Mettyu Houqan bildirib: “Hazırda ümumi bazar riskdən qaçış rejimindədir. Kriptovalyuta buna ilk reaksiya verən olub.”
Son bir ayda, birja investisiya fondu menecerlərindən tutmuş korporativ investorlara qədər bir çox böyük alıcının bazardan çəkildiyi müşahidə olunur. Bu isə ilin əvvəlində Bitcoinin qiymətini rekord səviyyələrə qaldıran likvidlik axınının azalmasına gətirib çıxarıb. Eyni dövrdə yüksək qiymətləndirilmiş texnologiya səhmlərinin ucuzlaşması da investorların ümumi risk iştahını zəiflədib.
