SSRİ dövründə Stalinin əmri ilə bütöv xalqların uzaq Sibirə, Qazaxıstana sürgün edildiyi məlumdur. Çeçenlər, krım tatarları, ukraynalılar və başqa xalqların kütləvi deportasiyası uzaq olmayan tarixdən məlumdur.
Rusiya işğal olunmuş Ukrayna ərazilərinin sakinlərini zorla Sibirə və Uzaq Şərqə köçürməyə hazırlaşır.
Bu barədə Ukrayna Silahlı Qüvvələrinin Xüsusi Əməliyyat Qüvvələrinin bölməsi olan Milli Müqavimət Mərkəzi ( MMM) məlumat verib.
Milli Müqavimət Mərkəzinin məlumatına görə, Kreml bununla Rusiyanın boşalmış bölgələrini yenidən məskunlaşdırmaq niyyətindədir.
Milli Müqavimət Mərkəzi bildirir ki, Rusiya hakimiyyəti artıq bu proqramın birinci mərhələsinə başlayıb: işğal "idarələrinə", məktəblərə, xəstəxanalara və kommunal xidmət şirkətlərinə Uzaq Şərqə "mümkün uzunmüddətli təyinatlar üçün işçilərin müəyyən edilməsi" tələbi ilə rəsmi məktublar göndərilib.
Bunun ardınca, sosial şəbəkələrdə Ukraynanın işğal olunmuş Berdyansk şəhərindəki müəllimlərdən Vladimir Putinə "müraciətlər" yayılıb və Rusiya hökmdarından onları isti dənizkənarı şəhərdən Rusiya Sibirinə köçürməməsini istəyiblər.
Ukraynanın Milli Müqavimət Mərkəzi qeyd edir ki, Rusiya hakimiyyəti 80 il əvvəl SSRİ-nin Krım tatarlarını, ukraynalıları, çeçenləri və digər xalqları zorla deportasiya etdiyi Sovet "mütəşəkkil köçürmə" metodlarını təkrarlayır və Putinin Stalin metodlarını tətbiq etdiyini vurğulayırlar.
Ukrayna kəşfiyyat orqanlarının məlumatına görə, Kreml Sergey Şoyqunun elan etdiyi genişmiqyaslı "Sibir İnkişaf Proqramı"nı həyata keçirmək üçün Donetsk, Luqansk, Zaporojye və Xerson vilayətlərinin işğal olunmuş hissələrinin sakinlərindən istifadə etməyi planlaşdırır. "Sibir boşalıb, ruslar getmək istəmirlər - buna görə də Kreml, ukraynalıları sürgün etməklə "yeni imperiyasını" qurmağa hazırlaşır"-, MMM -in müraciətində belə deyilir.
Rusiya müharibənin başlanğıcından bəri Ukrayna vətəndaşlarını deportasiya edir.
Ali Radanın İnsan Hüquqları üzrə Komissarı Dmitri Lubinets bildirib ki, 2022-ci ildən bəri ukraynalı uşaqların zorla çıxarılması ilə bağlı 19 500-dən çox fakt qeydə alınıb.
2025-ci ilin sentyabr ayına olan məlumata görə, Ukrayna Prezidenti Zelensky onlardan 1625-nin Ukraynaya qaytarıldığını bildirib.
Haaqa Beynəlxalq Cinayət Məhkəməsinin Vladimir Putin və Rusiyanın Uşaq Hüquqları üzrə Komissarı Mariya Lvova-Belova üçün həbs qərarı verməsinin səbəbi də, məhz ukraynalı uşaqların deportasiyası olub.
Musavat.com
