Bakı, 7 noyabr, AZƏRTAC
Prezident İlham Əliyevin Azərbaycan Milli Elmlər Akademiyasının 80 illik yubileyinə həsr olunmuş tədbirdə səsləndirdiyi fikirlər onun ölkəmizin tarixi haqlarının bərpası və bölgədə dayanıqlı sülhün təmin olunması istiqamətindəki prinsipial mövqeyini bir daha əks etdirdi.
Bu sözləri AZƏRTAC-a açıqlamasında siyasi şərhçi Xəyal Bəşirov söyləyib.
O qeyd edib ki, Azərbaycanın tarixi haqları bərpa olunmalıdır və dövlətimizin başçısı bu mövqedən zərrə qədər də geri çəkilmir. “Azərbaycan dövlətinin tarixi torpaqları ilə bağlı mövqeyi birmənalıdır. Prezident İlham Əliyevin çıxışlarının mahiyyəti eynidir və bu çıxışlarda həm beynəlxalq hüququn prinsipləri, həm də ədalət anlayışı əsas götürülür. Dövlətimizin başçısı açıq şəkildə bildirir ki, azərbaycanlılar öz tarixi torpaqlarına ləyaqətli, dinc və silahsız şəkildə qayıtmalıdırlar. Bu, həm niyyətimizin sülhə yönəlik olduğunu göstərir, həm də qarşı tərəfdən eyni xoş niyyəti gözlədiyimizi ifadə edir”.
Siyasi şərhçi bildirib ki, Prezidentin “tanklarla deyil, avtomobillərlə qayıdış” ifadəsi Azərbaycanın sülhə sadiqliyinin və güc tətbiqindən uzaq yanaşmasının təzahürüdür. Bu, eyni zamanda, beynəlxalq hüquqa və BMT Nizamnaməsinə uyğun şəkildə irəli sürülən haqlı tələbin ifadəsidir. Təəssüf ki, bəzi qüvvələr, o cümlədən Ermənistan daxilindəki bir sıra dairələr bu fikirləri təhrif edərək ərazi iddiası kimi qələmə verməyə çalışırlar. Lakin reallıqda bu, ərazi iddiası deyil, tarixi ədalətin bərpası məsələsidir. Cənubi Qafqazda ədalət yalnız o zaman bərpa olunacaq ki, doğma yurdlarından didərgin düşmüş yüz minlərlə azərbaycanlı ləyaqətlə həmin torpaqlara qayıtsın”.
Avqustun 8-də Vaşinqtonda əldə olunan razılaşmadan sonra regionda yeni reallıqlar yarandığını vurğulayan Xəyal Bəşirov deyib: “Vaşinqton razılaşması və sülh sazişinin mətninin paraflanması prosesindən sonra Ermənistan tərəfi də anlayır ki, Azərbaycanla münasibətlərin normallaşdırılmasından və sülh sazişinin imzalanmasından başqa çıxış yolu yoxdur. Bu, Ermənistan üçün həm siyasi, həm də regional sabitlik baxımından yeganə alternativdir”.
O əlavə edib ki, son aylar Ermənistan tərəfindən atılan bəzi addımlar - konstitusiya dəyişikliklərinin gündəmə gətirilməsi, erməni tarixinin reallıqlara uyğunlaşdırılması, Azərbaycan vətəndaş cəmiyyətinin nümayəndələrinin İrəvana səfərinə adekvat reaksiya verilməsi müsbət siqnallar kimi qiymətləndirilməlidir:
“Ermənistan artıq özünün sərhəd-keçid məntəqələrində Türkiyəyə qarşı iddiaları simvolizə edən Ağrı dağı təsvirini pasport möhürlərindən çıxarıb. Bu, uzun illərdir atılmalı olan bir addım idi. Bunun məhz indi həyata keçirilməsi Ermənistanın bölgədə yeni mərhələyə keçmək niyyətindən xəbər verir. Bundan başqa, Ermənistanda Azərbaycan dilinin tədrisinə başlanılması da ölkəmizin haqlı tələblərinin qəbulu istiqamətində mühüm göstəricidir”. Siyasi şərhçinin fikrincə, bu kimi addımlar Ermənistanın tarixi reallıqları qəbul etməyə başladığını göstərir:
Xəyal Bəşirov vurğulayıb ki, Prezident İlham Əliyevin illərdir səsləndirdiyi bütün fikirlər və çağırışlar ardıcıl şəkildə reallaşır: “İkinci Qarabağ müharibəsində ərazi bütövlüyümüz təmin olundu, daha sonra suverenliyimiz bərpa edildi, indi isə regionda dayanıqlı sülhün və etimad mühitinin formalaşdırılması mərhələsinə keçilib. Ermənistanın Türkiyə və Azərbaycana qarşı düşmənçilik nişanələrindən imtina etməsi bu prosesin mühüm tərkib hissəsidir”.
Siyasi şərhçi hesab edir ki, Ermənistan hələ üzərinə düşən bir çox öhdəlikləri yerinə yetirməlidir: “Əgər sülhün davamlı və uzunömürlü olmasını istəyiriksə, Ermənistan münaqişənin başlandığı ilk günə, yəni, azərbaycanlıların orada yaşadıqları, Azərbaycan dilinin işlədildiyi dövrə qayıtmalıdır. Bu, yalnız keçmişin ədalətli səhifəsinə dönməklə mümkündür. Azərbaycan tərəfi bu istiqamətdə təşəbbüskarlığını davam etdirir və vətəndaş cəmiyyəti səviyyəsində də sülh təşəbbüslərini irəli sürür. Bu, bir daha göstərir ki, Azərbaycan düşmənçilik səhifəsini bağlamaq, sülh, qonşuluq və əməkdaşlıq səhifəsini açmaq niyyətindədir”.
Xəyal Bəşirov sonda qeyd edib ki, Azərbaycan yeni müharibə tərəfdarı deyil və bütün səylər sülhə, sabitliyə və regional əməkdaşlığa yönəlib.
