Energetika naziri Pərviz Şahbazovla bp-nin Azərbaycan, Gürcüstan və Türkiyə üzrə regional prezidenti Ciovanni Kristofoli arasında görüş keçirilib.
Nazirlikdən AZƏRTAC-a bildiriblər ki, görüşdə Azərbaycanın enerji sahəsində strateji tərəfdaşı bp ilə uzunmüddətli səmərəli əməkdaşlığın yeni mərhələdə inkişafına dair fikir mübadiləsi aparılıb. Şirkətlə neft-qaz və bərpaolunan enerji sahələrində əməkdaşlığın cari vəziyyəti və birgə layihələrin icrası müzakirə olunub.
Bu xüsusda, Azəri-Çıraq-Dərinsulu Günəşli (AÇG) yatağında neft hasilatının sabitləşdirilməsi, AÇG-də sərbəst qazın işlənməsi layihəsi çərçivəsində həyata keçirilən tədbirlər nəzərdən keçirilib. Həmçinin “Şəfəq-Asiman”, “Şahdəniz Kompressiya”, “Qarabağ” və “Əşrəfi-Dan Ulduzu-Aypara” (ƏDUA) layihələri üzrə görülən işlər və perspektivlər dəyərləndirilib.
Görüşdə 240 MVt gücündə “Şəfəq” Günəş Elektrik Stansiyasının tikintisi ilə bağlı məsələlər də müzakirə edilib. Layihə bp-nin Azərbaycanın işğaldan azad olunmuş ərazilərinin bərpasına ilkin mərhələdə verdiyi töhfənin göstəricisi kimi yüksək qiymətləndirilib. Qeyd olunub ki, bu layihə “Səngəçal” terminalının elektrikləşdirilməsini təmin etməklə enerji keçidi istiqamətində həyata keçirilən fəaliyyətin nümunəsidir.
Söhbət zamanı Xəzər hövzəsi və Mərkəzi Asiyanın enerji resursları ilə Avropa bazarı arasında Azərbaycanın körpü rolunun xüsusi əhəmiyyət daşıdığı vurğulanıb, bu strateji üstünlüyün gələcəkdə daha da gücləndirilməsi məqsədilə əməkdaşlıq imkanları nəzərdən keçirilib.
