Şimali Atlantika Alyansı (NATO) davam edən təlimlər zamanı Kalininqrad bölgəsinin blokadasını nəzərdə tutan ssenarini həyata keçirir.
Publika.az xəbər verir ki, bunu “İzvestiya”ya müsahibəsində Rusiya xarici işlər nazirinin müavini Aleksandr Qruşko deyib.
Diplomat vurğulayıb ki, Baltikyanı region koalisiya qüvvələrinin və aktivlərinin artırılması yolu ilə aktiv hərbiləşdirmədən keçir. Onun sözlərinə görə, Baltikyanı region əvvəllər əməkdaşlıq zonası idisə, indi NATO-nun səyləri sayəsində qarşıdurma zonasına çevrilib.
"Bu il Alyans "Baltic Sentinel" missiyasını işə salıb və onun vasitəsilə Rusiyanın maraqlarına uyğun olaraq həyata keçirilən dəniz yük daşımalarına nəzarət etmək və məhdudlaşdırmaq məqsədilə bu su yolunda öz naviqasiya qaydalarını yaratmağa çalışır", - Qruşko bildirib.
