Göz damlaları infeksiya, allergiya, quruluq və iltihab kimi problemlərin müalicəsində geniş istifadə olunan maye dərman formasıdır.
Pravda.az bildirir ki, bu damlalar düzgün tətbiq edilmədikdə fayda vermək əvəzinə, gözə zərər də verə bilər.
Həkimlərin sözlərinə görə, damla istifadə etməzdən əvvəl əllər mütləq yuyulmalı, şüşə ucu gözə və ya kirpiklərə toxundurulmamalıdır. Damlama zamanı baş bir qədər arxaya əyilib alt göz qapağı aşağı çəkilməli, damladıldıqdan sonra isə göz qapağı bir qədər qapadılaraq iç bucaq hissəsinə yüngül təzyiq göstərilməlidir. Bu üsul dərmanın gözyaşı kanalı ilə axmasının qarşısını alır.
Mütəxəssislər xəbərdarlıq edir ki, steroid tərkibli göz damlaları yalnız həkim nəzarəti ilə istifadə olunmalıdır. Özbaşına istifadə edildikdə bu cür preparatlar göz təzyiqini artıra və görmə sinirinə zərər verə bilər.
Kontakt linza istifadəçilərinə isə damladan əvvəl linzaları çıxarmaq tövsiyə olunur. Həmçinin damlalar açıldıqdan sonra steril şəraitdə saxlanmalı və müəyyən müddətdən sonra yenilənməlidir.
Əminə Bayramova
