Bioloqlar aşkar ediblər ki, geoloji proseslər və ya eroziya nəticəsində Yer səthinə açıq qalan iki növ parlaq narıncı Kanada şibyələri qeyri-adi dərəcədə tez-tez kolonizasiya olunur.
AFN.az xəbər verir ki, bununla bağlı Böyük Britaniyadakı Redinq Universitetinin mətbuat xidməti məlumat yayıb. Bildirilir ki, bu, dronlar və ya hava fotoqrafiyası vasitəsilə belə çöküntülərin lokalizasiyasını müəyyən etməyə imkan verəcək.
Universitetin məlumatına görə, Redinq Universitetinin dosenti Brayan Piklz qeyd edib ki, bu şibyələrin ən çox 75 milyon il əvvəl Yer səthinin altında basdırılmış dinozavr sümüklərini kolonizasiya etməsi təəccüblüdür. “Bu şibyələrin spektral xüsusiyyətləri dronlar vasitəsilə izlənilə bilər ki, bu da paleontoloqların fosil axtarışı üsulunda potensial olaraq inqilab yarada bilər” - deyə alim bildirib.
Piklz bu kəşfi Kanadanın Alberta əyalətindəki Dinozavr Parkının üç fərqli bölgəsində şibyə populyasiyalarını araşdırarkən edib. Bu ərazi son yarım əsr ərzində çoxlu sayda dinozavr və digər gec Təbaşir dövrü fosillərinin aşkar edildiyi UNESCO-nun Dünya İrsi Siyahısına daxildir.
Qalıqlar əvvəlcə Dinozavr Parkının qərbindəki dağ yamaclarındakı qayalarda ilişib qalmışdı, lakin bir çoxu buzlaq hərəkəti nəticəsində səthə çıxıb. Bu, elm adamları üçün onları daha əlçatan etsə də, fosillər təbii qüvvələrin təsirinə məruz qalır. Şibyələr isə ifrazatları vasitəsilə böyüdükləri materialı tədricən aşındıraraq bu qalıqları təsir altına alır.
Bu mülahizələri nəzərə alaraq, bioloqlar Dinozavr Parkındakı bir neçə qədim dinozavr sümük qruplarını dronlar vasitəsilə fotoşəkilləndirib və nəticələri maşın öyrənmə sistemləri ilə təhlil ediblər. Təhlil göstərib ki, Rusavskia elegans və Xanthomendoza trachyphylla növləri bəzi hallarda fosil səthinin 50%-ə qədərini örtür, halbuki bitişik qaya təbəqələrinin cəmi 1%-ində müşahidə olunub.
Tədqiqatçılar bildirirlər ki, bu kəşf açıqda tapılan dinozavr sümüklərinin tez-tez narıncı şibyələrlə örtülməsinə dair müşahidələri təsdiqləyir. Bu, gələcəkdə fosil yataqlarının daha dəqiq və tez müəyyən edilməsinə imkan verə bilər.
