BAKI, 3 noyabr. TELEQRAF
İspaniya Ali Məhkəməsi ölkənin Baş prokuroru Alvaro Qarsiya Ortizə qarşı istintaq sirrini pozmaqda ittiham olunan iş üzrə dinləmələrə başlayıb.
Teleqraf xəbər verir ki, bu barədə “El Pais” məlumat yayıb.
Ali Məhkəmə dinləmələrin noyabrın 13-dək davam edəcəyini, 40-a yaxın şahidin dindiriləcəyi açıqlanıb.
Məhkəmə istintaqın 2024-cü ilin oktyabrında “vergi fırıldaqçılığı və fiziki şəxsə qarşı sənədlərin saxtalaşdırılması cinayətinin istintaqı ilə bağlı məlumatların yayılması səbəbindən sirrin mümkün açıqlanması ilə əlaqədar” başladığını bildirib. Yerli medianın verdiyi məlumata görə, Qarsiya Ortiz İspaniya tarixində müttəhim kürsüsünə çıxarılan ilk Baş prokuror olub.
İş Madrid vilayət hökumətinin başçısı və müxalif Xalq Partiyasının tərəfdarı İzabel Dias Ayusonun dostu Alberto Qonzales Amadorla bağlı istintaqdan məxfi məlumatların sızdırılmasına görə Baş prokurorun mümkün məsuliyyəti ilə əlaqəlidir.
