Paris, 31 oktyabr, AZƏRTAC
Fransada 2024-cü il ərzində 107 qadın öz həyat yoldaşı və ya keçmiş həyat yoldaşı tərəfindən qətlə yetirilib. Bu rəqəm bir il əvvəlki göstəricidən 11 faiz çoxdur.
AZƏRTAC xəbər verir ki, bu barədə Daxili İşlər Nazirliyinin illik hesabatında məlumat verilib.
Nazirliyin oktyabrın 31-də açıqladığı hesabatda bildirilir ki, ötən il ölkədə ümumilikdə 138 ailədaxili zorakılıq nəticəsində ölüm hadisəsi qeydə alınıb. Onların arasında 31 kişi də həyat yoldaşı və ya keçmiş tərəfdaşı tərəfindən öldürülüb.
Hesabatda qeyd olunur ki, 2024-cü ildə qadınlara qarşı ailə zorakılığı nəticəsində ölüm halları yenidən artıb. Ekspertlər bu artımı həm pandemiyadan sonrakı sosial gərginlik, həm də psixoloji və iqtisadi asılılıq vəziyyətlərindəki dərinləşmə ilə əlaqələndirirlər.
Daxili İşlər Nazirliyinin araşdırmasına əsasən, qətllərin əksəriyyəti uzunmüddətli məişət zorakılığı və ya ayrılıqdan sonrakı münaqişələr fonunda baş verib.
Fransa hökuməti ailədaxili zorakılıqla mübarizəni milli prioritet elan etsə də, qeydə alınan rəqəmlər bu sahədə yetərli irəliləyişin əldə olunmadığını göstərir. Qadın hüquqları üzrə təşkilatlar hökuməti profilaktik tədbirləri gücləndirməyə, xüsusilə də qoruyucu məhkəmə qərarlarının və yardım xətlərinin effektivliyini artırmağa çağırıblar.
Mütəxəssislər hesab edirlər ki, bu statistika təkcə fərdi faciələri deyil, həm də Fransada sosial və mədəni münasibətlərin dərin problemlərini üzə çıxarır. Onların fikrincə, qadınlara qarşı zorakılığın qarşısını almaq üçün təhsil, hüquq-mühafizə və sosial xidmətlərin koordinasiyalı fəaliyyəti vacibdir.
