ABŞ-da tamamilə qızıldan hazırlanmış və dəyəri 10 milyon dollardan çox olan unikal unitaz satışa çıxarılacaq.
Musavat.com xəbər verir ki, çəkisi 100 kiloqramdan artıq olan bu nadir əşya həm sənət əsəri, həm də tam funksional “luks” sanitar texnikası kimi təqdim olunur.
Əsər hazırda Nyu-Yorkdakı “Guggenheim” muzeyində saxlanılır və yaxın vaxtlarda xüsusi açıq satışda təqdim ediləcək. Qızıl unitazın dizaynı və hazırlanması italyan əsilli məşhur konseptual sənətçi Mauritsio Kattelan tərəfindən həyata keçirilib. O, bu əsəri “Amerika” adlandırıb — əsərin ideyası kapitalizm, sərvət bərabərsizliyi və istehlakçılıq simvolikasına satirik baxış kimi qiymətləndirilir.
Kattelan bir müddət əvvəl jurnalistlərə açıqlamasında demişdi:
“Bəzən bir əsərdən çox, onun yaratdığı suallar dəyərlidir. Bu unitaz sadəcə qızıl deyil, cəmiyyətin özünə baxış güzgüsüdür”.
Məlumata görə, “qızıl taxt” tam işlək vəziyyətdə saxlanılır və nümayiş zamanı ziyarətçilərin ondan real şəkildə istifadə etməsinə də icazə veriləcək. Əsərin sığorta dəyəri 10 milyon dollardan çoxdur və satışdan əldə ediləcək gəlirin bir hissəsinin xeyriyyə məqsədlərinə yönəldiləcəyi bildirilir.
Xatırladaq ki, bu unikal qızıl unitaz 2016-cı ildə ilk dəfə “Guggenheim” muzeyində nümayiş olunarkən böyük rezonans doğurmuşdu. Həmin dövrdə on minlərlə insan sadəcə bu əşyanı görmək üçün muzeyə axın etmişdi.
İndi isə əsər bir daha gündəmdədir — bu dəfə “sərvətin simvolu” kimi deyil, sosial satira ilə dolu müasir incəsənət tarixinin ən bahalı ironiyası kimi.
Musavat.com
