Rusiyada Ukrayna müharibəsində iştirak etmiş şəxslərin törətdiyi cinayətlərin sayı sürətlə artır.
Musavat.com xəbər verir ki, “Xüsusi hərbi əməliyyat” veteranları, silah və cəzasızlıq hissi ilə dolu şəkildə, getdikcə daha çox kriminal xronikada yer alırlar. Hüquq-mühafizə orqanlarının məlumatlarına görə, ən çox rast gəlinən hallar qətl, zorlama və xuliqanlıqdır.
Müharibədən qayıdanların bir çoxu cəbhədə qazanılmış zorakı davranış modellərini mülki həyata daşıyır, nəticədə ölkədə sosial gərginlik və cinayət göstəriciləri artır.
Qatar vaqonunda zorlanma hadisəsi
Hakasiyadan olan 58 yaşlı Vladimir Şarafutdinov “Moskva–Abakan” qatarında 18 yaşlı tələbə qızı zorlamada ittiham olunur. O, vaqonun tualetində gənc qıza hücum edib, qızın kömək üçün qışqırmasına baxmayaraq zorakılığı davam etdirib. Dindirilmə zamanı “SVO veteranı” olduğunu bildirən Şarafutdinov azadlığa buraxılıb. O, hadisənin guya “qarşılıqlı razılıq əsasında” baş verdiyini iddia edib.
Uşaqqatil cəbhəyə qaçdı
Yekaterinburqlu 49 yaşlı hüquqşünas Aleksandr Qook 42 yaşlı qadını və onun altı yaşlı oğlunu amansızcasına qətlə yetirib. Cinayət törətdikdən sonra məhkəmədən yayınmaq üçün Ukraynaya döyüşə yollanıb. İstintaq materiallarına görə, o, uşağın cəsədini zibil qutusuna atıb, qadının cəsədini isə doğrayıb. Bu vəhşilikdən sonra həmin şəxs “cəzadan yayınmaq” adı ilə cəbhəyə göndərilib.
Sərxoş döyüşçünün qurbanı olan uşaqlar
Yekaterinburq yaxınlığındakı Revda şəhərində 37 yaşlı müharibə iştirakçısı Mixail Slobodyan avtomobili ilə iki bacını — 7 və 9 yaşlı qızları — vuraraq öldürüb, üçüncü qız isə ağır yaralanıb. Ekspertiza nəticəsində Slobodyanın qanında həm alkoqol, həm də narkotik maddələr aşkarlanıb. Məhkəmədə o, “Ukraynada sürücülük vəsiqələrim yandı” deyərək Suxorov medalını göstərib və hərbi keçmişini bəraət kimi təqdim etməyə çalışıb.
Rusiyada ağır cinayətlərə görə məhkum olunan bir çox şəxs cəbhəyə göndərilməklə azadlığa buraxılıb. Onlardan biri — İvanovo vilayətindən olan, arvadını işgəncə ilə öldürməyə görə 20 il cəza almış məhkum — Ukraynada həlak olub. O, qadına 20-dən çox bıçaq və çəngəl zərbəsi endirib, üzünə sirkə tökərək təhqir etmişdi.
Rusiya mediası yazır ki, son aylarda xuliqanlıq maddəsi ilə açılan cinayət işlərinin sayı iki dəfə artıb. Hüquqşünaslar və psixoloqlar bunu cəbhədən qayıdan veteranların aqressiv davranışları, travma və cəzasızlıq sindromu ilə əlaqələndirirlər. “Mojem obyasnit” nəşrinin qeyd etdiyi kimi, cəmiyyət artıq “müharibədən qayıdanların zorakılığı” ilə yeni bir təhlükəli mərhələyə qədəm qoyub.
Musavat.com
