Musavat.com xəbər verir ki, İrəvanda keçirilən “Euronest” Parlament Assambleyasının sessiyasında Ermənistanın hakim “Vətəndaş Müqaviləsi” partiyasının deputatları Qarabağ ermənilərinin geri qayıtmaq hüququnu tələb edən qətnamənin əleyhinə səs veriblər.
Qətnamə müxalifət nümayəndələri — Artur Xaçatryan, Anna Qriqoryan, Elinar Vardanyan, Ayik Mamikonyan, eləcə də Avropa Parlamentinin iki sosialist üzvü tərəfindən təqdim olunmuşdu. Təklifdə Azərbaycan tərəfindən məcburi köçürülmüş Qarabağ sakinlərinin beynəlxalq təhlükəsizlik zəmanətləri altında doğma evlərinə kollektiv və təhlükəsiz şəkildə qayıtmaq hüququnun təmin edilməsi tələb edilirdi.
Müxalifət deputatı Artur Xaçatryan bildirib ki, “Vətəndaş Müqaviləsi” partiyasının nümayəndələri Avropa parlamentarilərinə bu təklifi dəstəkləməmələri üçün açıq şəkildə müraciət ediblər:
“Müxtəlif fraksiyalardan olan avropalı həmkarlarımızın sözlərinə görə, ‘Vətəndaş Müqaviləsi’nin nümayəndələri onları bizim düzəlişimizə səs verməməyə çağırıblar.”
Qərarın qəbul edilməməsi Ermənistan daxilində mübahisələrə səbəb olub. Müxalifət bu addımı Paşinyan hökumətinin “pro-azərbaycan xəttini davam etdirməsi” kimi qiymətləndirib.
Siyasi müşahidəçilər isə qeyd edirlər ki, “Vətəndaş Müqaviləsi”nin bu mövqeyi İrəvanın bölgədə yeni reallıqları qəbul etdiyini və Qarabağ məsələsində revanşist ritorikadan uzaqlaşmaq xəttini davam etdirdiyini göstərir.
Musavat.com
