Texnoloji aksiyaların güclü artımı fonunda ABŞ bazarlarında tarixi rekorda nail olunub...
Poliqon Bloomberg Agentliyinə istinadən xəbər verir ki, ABŞ-ın aparıcı mikrosxem istehsalçısı Nvidia tarixdə ilk dəfə olaraq bazar kapitallaşması 5 trilyon dollara çatan ictimai şirkət olub. Bu nailiyyət ABŞ fond bazarında texnoloji aksiyaların davam edən yüksəlişi və Federal Ehtiyat Sisteminin faiz dərəcəsini endirməsi ilə bağlı gözləntilər fonunda baş verib.
Maliyyə analitiklərinin fikrincə, Nvidia-nın bu göstəriciyə çatması süni intellekt texnologiyalarına olan qlobal tələbin və ABŞ bazarlarında texnoloji bumun ən parlaq nümunəsidir. Şirkətin səhmləri ilin əvvəlindən bəri rekord səviyyədə bahalaşıb və investorlar AI (süni intellekt) sektorundakı gələcək mənfəət artımını əsas stimullaşdırıcı amil kimi görürlər.
Eyni zamanda, bazarlar bu gün üç texnologiya nəhənginin – Microsoft, Alphabet (Google) və Meta Platforms – mənfəət hesabatlarını gözləyir. Uoll Strit analitikləri xüsusilə bu şirkətlərin süni intellekt sahəsinə yatırımları və bu investisiyaların nə zaman gəlir gətirməyə başlayacağı ilə bağlı açıqlamalara diqqət yetirəcəklər.
Müsbət xəbərlər yalnız texnoloji sektoru deyil, ümumi bazar əhvalını da gücləndirib. ABŞ Prezidenti Donald Tramp və Cənubi Koreya Prezidenti Li Çje Myon arasında imzalanmış yeni ticarət sazişi uzunmüddətli danışıqlara son qoyaraq, Asiya və Amerika bazarları arasında münasibətləri sabitləşdirib.
Bunun fonunda S&P 500 indeksi son 30 ilin ən uzunmüddətli yüksəliş dövrlərindən birini nümayiş etdirir. Bloomberg qeyd edir ki, qızıl və gümüş hasilatı ilə məşğul olan şirkətlərin səhmləri də bahalaşıb, çünki investorlar bu gün Federal Ehtiyat Sisteminin faiz dərəcəsini azaldacağına ümid edirlər.
Ekspertlər hesab edirlər ki, Nvidia-nın 5 trilyon dollarlıq mərhələyə çatması yalnız texnologiya sektorunun deyil, bütövlükdə qlobal iqtisadi dinamikaların yeni dövrə daxil olmasının göstəricisidir.
Poliqon.info
