BAKI, 29 oktyabr. TELEQRAF
ABŞ Rumıniya, Bolqarıstan, Macarıstan və Slovakiya da daxil olmaqla bir neçə Şərqi Avropa ölkəsindəki hərbi kontingentini eyni vaxtda ixtisar etməyi planlaşdırır.
Teleqraf xəbər verir ki, bu barədə Rumıniyanın “G4Media” portalı hökumətdəki mənbələrə istinadla məlumat yayıb.
Mənbələrin bildirdiklərinə görə, oktyabrın 27-də NATO-nun rəsmi kanalları vasitəsilə 800-ə yaxın hərbçinin Rumıniyadan çıxarılması barədə qərar elan edilib. Bu qərar Ağ Ev tərəfindən təsdiqlənib və artıq qüvvəyə minib. Amma ABŞ Konqresi hələ də qərarı nəzərdə keçirə və etiraz edə bilər.
Rumıniyadakı ABŞ hərbçiləri dörd bazada yerləşib. Ümumilikdə, bu ölkədə təxminən 1000 ABŞ hərbi qulluqçusu var.
ABŞ-nin Macarıstandakı hərbi qüvvələrinin də çıxarılması planlaşdırılır ki, bu da daha geniş strateji baxışdan xəbər verir.
Rumıniya nəşri yazıb ki, azalma daha iki ölkəyə - Bolqarıstan və Slovakiyaya da təsir edəcək. Amma əməliyyatın dəqiq vaxtı, miqyası və logistika detalları hələlik açıqlanmayıb.
