Azərbaycan Universitetində maarifləndirici tədbir keçirilib

Azərbaycan Universitetində Sosial işin təşkili kafedrasının nəzdində fəaliyyət göstərən “Sossfera” Sosial Ä°nkişaf Klubunun təşəbbüsü ilə “Erkən nikah – itirilmiş arzular” adlı maarifləndirici tədbir keçirilib. Tədbirin qonağı “Azərbaycan Uşaqları” Ä°ctimai Birliyinin sədri Kəmalə Ağazadə olub.

Tədbiri giriş sözü ilə klubun sədri, Sosial iş ixtisası üzrə II kurs tələbəsi Cansu Nəzərova açaraq, mövzunun aktuallığını və əhəmiyyətini vurğulayıb, qonağı tələbələrə təqdim edib. Klub sədri “Erkən nikaha yok deyək” mövzusunda çıxış edərək erkən nikahın cəmiyyətə, təhsilə və fərdi həyata mənfi təsirlərindən danışıb.

Tədbirin qonağı Kəmalə Ağazadə erkən nikah problemlərinin mövcud vəziyyəti, rayonlarda müşahidə edilən hallar, statistika və bu istiqamətdə həyata keçirilən tədbirlər barədə iştirakçılara geniş məlumat verib. Kəmalə Ağazadə bildirib ki, erkən nikahlar bir çox hallarda qız uşaqlarının təhsilini yarımçıq qoymasına, fiziki və psixoloji travmalara səbəb olur. O, bu sahədə maariflənmənin, dövlət qurumlarının, qeyri-hökumət təşkilatlarının və ictimaiyyətin birgə fəaliyyətinin vacibliyini diqqətə çatdırıb.

Ardınca Sosial işin təşkili kafedrasının müdiri Nigar Şahhüseynbəyova və klubun ideya müəllifi, təsisçisi və kafedranın müəllimi Ayxan Şahbazov mövzu ilə bağlı fikirlərini bölüşüblər.

Tədbirdə erkən nikahın fəsadları ilə bağlı videoçarxlar nümayiş olunub, erkən nikahları yaradan əsas amillər, ailə və cəmiyyətin rolu, erkən nikahların qarşısının alınması yolları, həmçinin gənclərin hüquqları barədə fikir mübadiləsi aparılıb, suallar cavablandırılıb.