ain.az, Bizim media portalından verilən məlumatlara əsaslanaraq xəbər verir.
Türkiyədə qadınlar məcburi hərbi xidmətə cəlb oluna bilərlər.
Bizim.Media xəbər verir ki, yaxın günlərdə bununla bağlı Türkiyə Böyük Millət Məclisində təklif irəli sürülüb.Bu təklif Türkiyəylə yanaşı, Azərbaycanda da müzakirəyə və marağa səbəb olub.Maraqlıdır, Azərbaycanda belə bir təklif gündəmə gətirilə bilərmi? Azərbaycan qadınları da kişilər kimi ordunun bir üzvü olmalıdırlar?Bizim.Media mövzuyla bağlı Milli Məclisin üzvü Elnarə Akimovanın fikirlərini öyrənib. O, nəzərə çatdırıb ki, hərbin bəzi sahələrində fəaliyyət göstərən Azərbaycan qadınları var:“Əslində, hüquqi nöqteyi-nəzərdən bu məsələ bizdə artıq cavabını tapıb. Azərbaycan Konstitusiyasının 25-ci maddəsi açıq şəkildə bildirir ki, “kişilər və qadınlar eyni hüquq və azadlıqlara malikdirlər”. Bu, yalnız siyasi və sosial sahələrdə deyil, həm də dövlətin müdafiə və təhlükəsizlik prinsiplərində də keçərlidir. Qanun qadına da hərbi xidmət hüququ verir, sadəcə, bu, məcburi deyil, könüllü xarakter daşıyır.Nəzəri baxımdan bu mümkündür. Azərbaycan Silahlı Qüvvələrində qadınların fəaliyyəti artıq var- tibb, logistika, rabitə, hətta döyüş hazırlığı ilə bağlı sahələrdə qadın zabit və gizirlər xidmət edir”.Deputat deyir ki, qadınların məcburi hərbi xidməti isə hələki gözlənilmir:“Ümumi hərbi çağırış sisteminə xanımların da daxil edilməsi, yəni müəyyən yaşdan etibarən məcburi hərbi xidmətə cəlb olunması hələlik həm hüquqi, həm də sosial baxımdan real görünmür. Bunun üçün ciddi qanunvericilik dəyişiklikləri, həm də cəmiyyətin bu ideyaya hazır olması lazımdır”.Millət vəkili Azərbaycan qadınının döyüşkən ruhunu tarixi faktlarla da sübut edib:“Məsələ tək hüquqla bitmir. Azərbaycan qadını tarix boyu bu bərabərliyi yalnız kağız üzərində deyil, döyüş meydanlarında, səngərlərdə, hospital otaqlarında, ön və arxa cəbhədə sübut edib.Tarixə nəzər salsaq görərik ki, Azərbaycan qadını daim kişilərlə çiyin-çiyinə Vətən üçün mübarizə aparıb. Böyük Vətən Müharibəsində azərbaycanlı qadınların ön cəbhədə göstərdikləri qəhrəmanlıqlar xüsusi yer tutur. Minlərlə qadın könüllü şəkildə orduya yazıldı: Tamara Quliyeva, Züleyxa Seyidbəyli, Kubra Əliyeva kimi tibb bacıları, rabitəçi və snayper qadınlar ölümün gözünə dik baxaraq vətənpərvərlik dastanları yazdılar. Onların bəziləri geri dönmədi, amma bu gün də onların adları Azərbaycanın hər bir kəndində, məktəbində, ürəyində yaşayır”.“Evində silaha sarılan qadınlarımız...”Deputat əlavə edib ki, Birinci Qarabağ müharibəsində Azərbaycan qadını yenə səssiz qəhrəman idi:“Təkcə döyüş meydanında deyil, evdə, ailədə, arxada — oğlunu, ərini, atasını yola salan, amma özü də silaha sarılan qadınlar vardı. Şəhid qadın döyüşçülərimiz – onların hər biri Azərbaycanın igidlik tarixinin canlı səhifəsidir. İkinci Qarabağ müharibəsi isə Azərbaycan qadınının həm cəbhədə, həm də informasiya savaşında misilsiz bir qəhrəmanlıq salnaməsidir. Təkcə döyüş meydanında deyil, könüllü kimi yardım göndərən, əsgərə dua edən, informasiya cəbhəsində mübarizə aparan minlərlə qadın 44 günlük Zəfərin görünməz, amma möhkəm sütunu oldu.Vətən müharibəsinin yeganə xanım şəhidi Arəstə Baxışova da tibbi işçisi olub. O, Vətənin müdafiəsində qanunla yox, qəlbi ilə iştirak edib.Əgər gələcəkdə qadınların könüllü hərbi xidmət sistemi genişlənsə, bu, heç də təəccüblü olmaz. Çünki bu xalqın genetik yaddaşında Tomris kimi döyüşçü qadınların ruhu, Xurşidbanu Natəvan kimi müdriklərin irsi, Gəncə, Tovuz, Şuşa, Cəbrayıl səngərlərində can vermiş şəhid qızların izi yaşayır. Bu gün Azərbaycan qadını həm ana, həm döyüşçü, həm də diplomat kimliyi ilə ölkəsinin dayağıdır. Bəli, Azərbaycan qadını bu xalqın tarixində təkcə həyat verən deyil, həm də onu qoruyan qüvvədir. Onun Vətən sevgisi bəzən bir dua, bəzən bir güllə, bəzən bir yaralı əsgərin əlini sıxmaq qədər sadə, amma bir xalqın azadlığı qədər uca bir hissdir”, - deyə Elnarə Akimova qeyd edib.Nəzrin Mirzəyeva, Bizim.Media
Ən son xəbərləri və yenilikləri almaq üçün ain.az saytını izləyin.
