“SUP VC” MMC son günlər sosial mediada haqqında yayyılan məlumatlara münasibət bildirib.
Marja.az xəbər verir ki, “SUP VC” MMC açıqlamasında yayılan məlumatların "həqiqətə uyğun olmayan, qarayaxma xarakterli" məlumatlar olduğunu qeyd edib.
Açıqlamada bildirilir:
"Hüquqi status:
“SUP VC” MMC Azərbaycan Respublikasının qanunvericiliyinə əsasən dövlət qeydiyyatından keçmiş və öz nizamnaməsinə əsasən fəaliyyət göstərən hüquqi şəxsidir. Şirkətin yeganə təsisçisi və icraçı direktoru Eyvazov Rəşad Əsəf oğludur.
Fəaliyyət istiqamətləri və şəffaflıq:
“SUP VC” MMC innovasiya və startap ekosistemi sahəsində fəaliyyət göstərən bir şirkətdir və əsas istiqamətləri təlim, tədris, biznes inkubasiya və innovasiya layihələrinin idarə olunmasıdır.
Şirkət bu günə qədər həm dövlət qurumları, həm də özəl təşkilatlarla əməkdaşlıq çərçivəsində müxtəlif layihələr həyata keçirmiş, hər bir layihə üzrə sifarişçi tərəfə fəaliyyət və maliyyə hesabatlarını qanunvericiliyə uyğun şəkildə təqdim etmişdir.
“SUP VC” MMC yarandığı gündən bəri bütün vergi öhdəliklərini vaxtında və tam şəkildə yerinə yetirmiş, heç bir maliyyə və ya inzibati problem yaşamamışdır.
Caucasus Ventures ilə əlaqələr:
Şirkətimizin Caucasus Ventures ilə heç bir rəsmi və hüquqi bağlılığı yoxdur. Biz bu qurumla digər ekosistem nümayəndələri kimi əməkdaşlıq və qarşılıqlı əlaqələr saxlayırıq. Bununla belə, nəzərinizə çatdırmaq istərdik ki, bəzi sosial media paylaşımlarında qeyd olunduğundan fərqli olaraq, Caucasus Ventures-in sədrinin “SUP VC” MMC-də hər hansı payı və ya hüquqi iştirakçılığı mövcud deyil.
Son aylarda yayılan əsassız məlumatlara baxmayaraq, SUP VC MMC olaraq, biz hər hansısa konfliktə qoşulmaq istəmirik və hər zaman ekosistemin inkişafına töhfə verməyə, innovasiya və sahibkarlıq mühitinin güclənməsinə xidmət etməyə hazır olduğumuzu bildiririk
Şirkətimiz fəaliyyətini şəffaflıq, etik prinsiplər və qanunlara tam uyğun şəkildə həyata keçirir. Yayılan dezinformasiyaların artması ilə əlaqədar olaraq, ictimaiyyəti düzgün məlumatlandırmaq məqsədilə bu bəyanatla çıxış etməyi zəruri hesab edirik".
