Rəqəmsal inkişaf və nəqliyyat naziri Rəşad Nəbiyev Brüsseldə keçirilən “Global Gateway Forum 2025” çərçivəsində təşkil olunan Qara dəniz – Strateji Tərəfdaşlıq Panelində iştirak edib. Bu barədə Avtosfer.az-a Nazirlikdən bildirilib.
Məlumata görə, paneldə Azərbaycanın Avrasiya məkanında artan geoiqtisadi rolu, nəqliyyat və rəqəmsallaşma sahəsində həyata keçirdiyi innovativ layihələr nəticəsində ölkəmizin Avropa ilə Asiya arasında təhlükəsiz və sürətli məlumat dəhlizi, eləcə də rəqəmsal körpü kimi formalaşması istiqamətində atılan addımlar barədə məlumat verilib. Eyni zamanda infrastruktur sahəsində Azərbaycanın əldə etdiyi uğurların yalnız milli deyil, eyni zamanda regional davamlılığa xidmət etdiyi vurğulanıb. Bakı – Naxçıvan – Qars və Zəngəzur dəhlizlərinin bölgədə dayanıqlı və çevik nəqliyyat bağlantısının qurulması baxımından həyati əhəmiyyət daşıdığını qeyd edilib.
