Resursumuzun əsas məqsədlərindən biri Azərbaycan idmanını, o cümlədən onun ayrı-ayrı növlərini təbliğ etməkdir. Bunu yazının əvvəlində xüsusi vurğulamaq istəyirik ki, mövzumuzun məqsədi və mahiyyəti aydın olsun.
Belə ki, bu gün İdman.Biz-in əməkdaşlarından biri həndbolla bağlı mütəxəssislərin əlaqə məlumatlarını əldə etmək üçün Azərbaycan Həndbol Federasiyasının mətbuat xidməti ilə əlaqə saxlayıb. Məqsəd tam aydın idi - ölkəmizdə həndbolun vəziyyəti barədə müsahibə almaq və bu idman növünü gündəmə gətirmək.
Məsələ ondadır ki, bu gün Azərbaycan həndbolu haqqında danışmaq bizim üçün vacib göründü. Bu idman növü illər boyu ölkəmizə çoxsaylı çempionlar qazandırıb. Azərbaycan həndbolu uzun müddət yüksək nəticələrlə tanınıb. Uğurlarımız, ənənələrimiz, hətta olimpiya çempionlarımız var. Amma bütün bunlara baxmayaraq, bu gün həndbol ölkəmizdə ən populyar idman növlərindən biri sayılmır.
Biz bu vəziyyəti az da olsa dəyişmək, bu idman növünə diqqəti artırmaq üçün sadəcə bir yazı hazırlamaq istəyirdik. Lakin bu cəhd Azərbaycan Həndbol Federasiyasının mətbuat xidmətinin rəhbərinin açıq-aşkar qeyri-adekvat və kobud davranışı ilə qarşılaşdı.
Səbəb isə əməkdaşımızın “Azərbaycan mətbuatında həndbola yetərincə yer verilmədiyi” fikrini səsləndirməsi oldu. Bu sadə müşahidə federasiya nümayəndəsinin xoşuna gəlmədi.
Federasiya əməkdaşı sadəcə fikirlə razılaşmamaqla kifayətlənmədi (bu, tam normal olardı), o, kobud davranış sərgiləyib, səsini qaldıraraq media nümayəndəsinə qarşı hörmətsizlik edib, bütün bunlar azmış kimi, yaşla bağlı diskriminasiyaya yol verib.
Bu cür davranışı yalnız federasiya əməkdaşı üçün deyil, ümumiyyətlə, Azərbaycan kişisinə yaraşmayan hal hesab edirik. Həm də mətbuat xidməti rəhbərinin əsas vəzifəsi media ilə əməkdaşlıq etməkdir, bu münasibəti pozmaq deyil.
Azərbaycan Həndbol Federasiyasının rəhbərliyinə tövsiyə edirik ki, mətbuat xidməti əməkdaşlarının işinə diqqət yetirsin. Çünki belə davranışlar federasiyanın fəaliyyətinə, eləcə də ölkəmizdə həndbolun inkişafına kölgə salır.
İdman.Biz kollektivi
