Tel-Əviv Fond Birjasının TA-35 indeksi İsrail və HƏMAS-ın Qəzzada atəşkəs və bütün israilli girovların azad edilməsi barədə razılığa gəlməsi xəbərindən sonra tarixi maksimumunu yeniləyib, “Bloomberg” yazır.
İsrailin ən böyük 35 emitentini əhatə edən TA-35 indeksi 10 oktyabr ticarət sessiyasının sonunda 2,29% artaraq 3276,85 bəndə çatıb. Zirvədə indeks 2,6% artaraq 3285,66 bəndə qədər yüksəlib.
Agentliyin məlumatına görə, artımın liderləri tikinti şirkətləri və banklar olub. “Bloomberg” vurğulayır ki, TA-35 indeksi ilin əvvəlindən bəri demək olar ki, 36% artıb.
İsrail şekeli də 10 oktyabrda son üç ilin maksimumuna çataraq 0,7% möhkəmlənib və 1 dollara görə 3,24 səviyyəsində olub.
9 oktyabrda İsrail və HƏMAS Qəzzada atəşkəs sazişi imzalayıb. “Reuters”in məlumatına görə, sənəd döyüş əməliyyatlarının dayandırılmasını və bütün israilli girovların azad edilməsini nəzərdə tutur. Bunun müqabilində təxminən 2000 fələstinli məhbus azad ediləcək. Bu, müharibənin başa çatdırılmasına dair “Tramp planı”nın birinci mərhələsidir.
İsrailin Nazirlər Kabineti sazişi təsdiqləyib. Hal-hazırda Qəzzanın əksər hissəsində atəşkəs rejimi qüvvədədir, israilli qoşunlar mövqelərini tərk etməyə başlayıb, baxmayaraq ki, bəzi bölgələrdə döyüşlər hələ də davam edir, agentlik qeyd edib.
