Rusiya Müsəlmanlarının Dini İdarəsi kuryerlərin daşıdığı bütün məhsulları dini qaydalara uyğun olaraq “halal” və “haram” mallara bölən fətva verib. Qurumun internet saytında dərc edilən və müfti tərəfindən verilən fətvada ilk dəfə olaraq kuryer və logistika işçilərinin İslam qaydaları çərçivəsində iş prinsipləri ətraflı şəkildə açıqlanıb.
Hafta.az-ın RBC-ya istinadən yazdığına görə, müsəlman kuryerlərə spirtli içkilər, donuz əti, qumar ləvazimatları, bütpərəst dini əşyalar, İslam qaydalarına uyğun kəsilməyən heyvanların əti kimi “haram” əşyaları daşımaq qadağan edilib. Yeganə istisna bu cür əşyaların utilizasiya üçün daşınmasıdır. Bununla belə, fətva kuryerlərə içərisindən xəbərsiz olan möhürlənmiş qutuları daşımağa icazə verir. Bildirilib ki, əgər kuryer əşyanın içindən xəbərsizdirsə və qadağan olunmuş əşyanı daşımaq niyyətində deyilsə, bu, günah sayılmır.
Şura eyni sifarişdə həm halal, həm də haram məhsulların olduğu hallar üçün tənzimləmə tətbiq etdi. Sifarişdəki əşyaların əksəriyyəti halaldırsa, çatdırılma həyata keçirilə bilər, lakin gəlirin "təmizlənməsi" üçün çatdırılmadan əldə edilən gəlirin bir hissəsinin xeyriyyə fonduna bağışlanması tövsiyə olunur. Bildirilib ki, bu qərarlar Quran ayələri və hədislərə əsaslanır.
