I Qarabağ müharibəsinin tanınmış iştirakçısı, keçmiş tabor komandiri Gəray Əsədov revanşist, irqçi və faşist xislətli “Ayakve” erməni təşkilatının “Ermənilər güclənəcək və biz Qarabağı geri alacağıq” sərsəm bəyanatına sərt reaksiya verib.
Gəray Əsədov Hafta.az-a açıqlamasında bildirib ki, “Ayakve” kimi bütün revanşist, irqçi xislətli erməni təşkilatları bilməlidir ki, Qarabağ artıq erməni daşnakları və terrorçuları üçün deyil. Onlar bundan sonra on illər boyu nə qədər güclənsələr də, bizim bir ordu korpusu qədər güclü ola bilməzlər.
Keçmiş tabor komandiri diqqətə çatdırıb ki, “Ermənistanın bütöv ordusu bizim bir ordu korpusunun qarşısında dayana bilməz. Azərbaycan siyasi, iqtisadi və hərbi baxımdan Qafqazın lideri olan dövlətdir və bu, şübhəsizdir. Ordumuz dünyanın güclü ordularının sıralarındadır və daim döyüşə hazırdır. Həm mənəvi cəhətdən, həm şəxsi heyət, həm də silah‑sursat və texnika baxımından biz Ermənistan ordusunu dəfələrlə üstələyirik.”
“Siyasi və diplomatik gücümüz də kifayət qədər yüksəkdir və dünya bu reallığı qəbul edir. O, diqqətə çatdırdı ki, terrorçu və revanşist xislətli ermənilər bilməlidir ki, qarşıda hələ Zəngəzur, Göyçə, Basarkeçər, Dərələyəz və s. kimi tarixi torpaqlarımızla bağlı hədəflərimiz var və inşallah onları da həyata keçirəcəyik. Həmçinin qeyd etdi ki, ötən əsr boyu həmin torpaqlardan qovulmuş soydaşlarımızın geri dönməsi də başlıca məqsədlərdəndir”, - deyə Qarabağ qazisi vurğulayıb.
Keçmiş tabor komandiri bildirib ki, “Ayakve” kimi təşkilatların üzvləri, yəqin ki, XX əsrin 90‑cı illərində Azərbaycanın hələ yeni müstəqil dövlət kimi zəif olduğu, Ermənistanın isə Rusiya imperiyasına arxalandığı dövrdəki müvəqqəti uğurlarını yada salırlar. O, nəzərə çatdırıb ki, həmin dövrlərdə Azərbaycan ordusunda vəziyyət çox çətin idi — silah‑sursat təminatı, maliyyə problemləri və digər məhdudiyyətlər vardı. “1994‑cü ildə biz bircə ‘Qrad’ mərmisi üçün 996 dollar ödəyirdik. Bir 40 lüləlik ‘Qrad’ qurğusunu tam təchiz etmək təxminən 40 min dollar demək idi. Bir top mərmisini 500 dollara, bir avtomat gülləsini isə 1 dollara alırdıq. Ermənistana isə bu vasitələr Rusiyanın dəstəyi ilə çatdırılırdı; rus zabitlər də erməni tərəfdə geniş fəaliyyət göstərirdilər. Qarabağ qazisi bildirdi ki, belə bir şəraitdə biz bacardığımız qədər döyüşüb, mübarizə apararaq müəyyən uğurlar qazana bilirdik”.
“Bu gün — şəhid və qazilərimizin canı‑qanı bahasına Azərbaycanın ərazi bütövlüyünü demək olar ki, tam bərpa etməsindən sonra — Ermənistanın revanşist, irqçi dairələri tamamilə yanlış mövqedədir. O, vurğuladı ki, təbii ki, bu, hazırkı erməni hakimiyyətinin rəsmi mövqeyi sayıla bilməz. Həmçinin qeyd etdi ki, 1987–1990‑cı illərdə yol verdikləri səhvə bir daha yol verərlərsə, nəticələri ağır olacaq. Qarabağ qazisi bildirdi ki, bu dəfə bütövlükdə Ermənistanı itirə bilərlər”,- deyə sonda I Qarabağ savaşının iştirakçısı vurğulayıb.
Sultan Laçın
