Ajans.az xəbər verir ki, Macarıstan bu münaqişəyə cəlb olunmamalıdır və ölkəsinin milli maraqları hər şeydən öndə gəlir. Orban Macarıstanın mövqeyi ilə Brüsselin yanaşması arasında artan fərqliliyi qeyd edərək, “Bu, sadəcə fikir ayrılığı deyil, fəaliyyət fərqidir”, – deyə vurğulayıb. O, Avropanın Ukrayna ilə bağlı hərbi strategiyasını “fundamental səhv” adlandırıb və qeyd edib ki, Rusiyanın iqtisadi tükənmə nəticəsində geri çəkiləcəyi ilə bağlı gözləntilər özünü doğrultmayıb. “Müharibə nə qədər uzun çəkərsə, bir o qədər çox insan həyatını itirəcək. Avropa artıq 170-180 milyard avro xərcləyib, amma bu xərcin sonu görünmür. Bütün bu yanaşma yanlış təməl üzərində qurulub”, – deyə o bildirib. Orban Ukraynanın Aİ-yə potensial üzvlüyünə də münasibət bildirib. Onun sözlərinə görə, bu qərar bütün 27 üzv dövlətin yekdil razılığı ilə qəbul olunmalıdır və Macarıstan bu addımı dəstəkləməyəcək:
“Macar xalqı Ukrayna ilə ittifaqda olmaq istəmir. Biz ukraynalıların qəhrəmancasına mübarizəsinə rəğbət bəsləyirik, lakin onların taleyini bölüşmək istəmirik.” Baş nazir əlavə edib ki, Macarıstan Ukrayna ilə ikitərəfli tərəfdaşlığı dəstəkləyir, lakin tamhüquqlu üzvlük ideyasını qəbul etmir:
“Ukraynanı qəbul etsək, Rusiya ilə müharibə vəziyyətində olarıq. Biz Ukrayna üçün ölmək istəmirik”, – deyə o, macar xalqının təhlükəsizliyinin prioritet olduğunu vurğulayıb. Orbanın bu sərt mövqeyi Aİ-nin mövcud siyasətindən kəskin şəkildə fərqləndiyindən, o, Brüsselin hərbi planlarına qarşı ümummilli imza kampaniyasına çağırış edib.

 

• Macarıstan
• Ukrayna
• Müharibə
• Viktor Orban
• Milli Maraqlar