Prezident İlham Əliyevin sentyabrın 25-də BMT Baş Assambleyasının 80-ci sessiyasında çıxış edib. Cənab Prezidentin sessiya çərçivəsindəki çıxışı Azərbaycanın qlobal miqyasda sülh və əməkdaşlıq çağırışlarını bir daha gündəmə gətirib.
Dövlət başçımızın verdiyi mesajlar, xüsusilə bölgədə davamlı sülhün təmin olunmasına dair iradəni bir daha beynəlxalq aləmə göstərdi.
Modern.az-a açıqlamasında Milli Məclisin Beynəlxalq münasibətlər və parlamentlərarası əlaqələlər komitəsinin üzvü Rizvan Nəbiyev qeyd edib ki, Azərbaycan Respublikasının Prezidenti cənab İlham Əliyevin Birləşmiş Millətlər Təşkilatının Baş Məclisinin 80-ci sessiyasında çıxışı Azərbaycanın beynəlxalq münasibətlərdə tutduğu prinsipial mövqeyi, beynəlxalq hüquqa sadiqliyi, regional sülhə, sabitliyə və təhülkəsizliyə verdiyi töhfəni bir daha aydın şəkildə nümayiş etdirdi. Onun sözlərinə görə, cənab Prezident illər boyunca BMT tribunasından Azərbaycanın üzləşdiyi işğal və təcavüz faktlarını gündəmə gətirdiyini xatırladaraq, bu gün artıq qalib dövlətin lideri kimi regionda sülhə və əməkdaşlığa töhfə verməyə hazır olduğunu bəyan etdi:
“Bu, təkcə milli maraqların təmin olunması deyil, eyni zamanda beynəlxalq hüququn aliliyinin təsdiqi baxımından da mühüm presedent kimi qiymətləndirilir. Belə ki, beynəlxalq sülhün və təhlükəsizliyin təmin olunması, BMT Nizamnaməsinə görə, onun ali orqanlarından olan Təhlükəsizlik Şurasının üzərinə düşsə də, bu kontekstdə real addımlar atılmadı.
Postmünaqişə dövründə aparılan Sülh danışıqlarını üçüncü qüvvələrin müdaxiləsindən qorumaq və vasitəçisiz uğurla başa çatdırmaq da sülh qazanmağın Azərbaycan modelinin əsas komponentlərindən biridir. Regionda sülhü və təhlükəsizliyi hərbi, siyasi və diplomatik vasitələrlə təmin edən, müharibəni və sülhü qazanan dövlətin lideri bu təcrübəni - Azərbaycan təcrübəsini bölüşməyə hazır olduğumuzu sözügedən universal təşkilatın ali kürsüsündən bəyanat etdi”.
Millət vəkilinin sözlərinə görə, dövlət başçısının çıxışında əks olunan əsas mesajlar son beş ildə, Şanlı Zəfərimizdən sonra regionda yaranmış yeni geosiyasi reallıqların təməlində duran mühüm məqamları əhatə edir:
“Cənab Prezidentin vurğuladığı kimi, Azərbaycan uzun illər işğal və ədalətsizlikdən əziyyət çəkdiyi, ikili standartlarla üz-üzə qaldığı halda, BMT nizamnaməsinə, müvafiq qətnamələrinə və beynəlxalq hüquq prinsiplərinə əsaslanaraq ərazi bütövlüyünü və suverenliyini bərpa etdi”.
Deputat vurğulayıb ki, çıxışda Azərbaycanın beynəlxalq əməkdaşlığa və konstruktiv dialoqa açıq olması, eyni zamanda ikili standartlara qarşı prinsipial mövqe tutması xüsusi yer alır.
“Prezident İlham Əliyevin “Gəlin, birlikdə ikili standartların aradan qalxdığı, ədalətin selektiv olmadığı dünya quraq” çağırışı, qlobal miqyasda hüquq və ədalətə əsaslanan yeni beynəlxalq münasibətlər sisteminə ehtiyac olduğunu diqqətə çatdırır”.
O həmçinin əlavə edib ki, bu, həm inkişaf etməkdə olan ölkələrin,eləcə də münaqişə bölgələrinin ədalətli münasibətə ehtiyacı olduğuna dair mühüm mesajdır:
“Ölkə başçımız tərəfindən verilən mesajın əhəmiyyəti həm də ona görə diqqət çəkir ki, BMT təşkilat olaraq Nizamnaməsinin 2-ci maddəsinə görə, üzv dövlətlərin suveren bərabərliyi prinsipinə əsaslanır.
Azərbaycan Respublikasının Prezidenti BMT tribunasından çıxış edərək ölkəsinin sülh təşəbbüslərinə sadiqliyini, dövlətlərarası münasibətlərdə qarşılıqlı hörmət və suverenliyə əsaslanan yanaşmanı dəstəklədiyini bir daha bəyan etmişdir.
Bu yanaşma, hazırkı dövrdə beynəlxalq təhlükəsizlik və davamlı inkişaf üçün strateji əhəmiyyət kəsb edir”.
Yekun olaraq millət vəkili nəzərə çatdırıb ki, Prezident İlham Əliyevin çıxışı BMT-nin ali tribunasında Azərbaycanın haqlı mövqeyinin və beynəlxalq hüquqa söykənən siyasətinin ifadəsi olmaqla yanaşı, həmçinin qlobal ədalət, sabitlik və əməkdaşlıq çağırışının da bariz nümunəsidir:
“Prezidentin çıxışı Azərbaycan diplomatiyasının sülh yönümlü, prinsipial və konstruktiv xarakter daşıdığını bir daha sübut edir. Bu çıxış, həm regional sabitlik, həm də beynəlxalq əməkdaşlıq üçün əhəmiyyətli bir sənəd kimi qiymətləndirilə bilər”,- deyə R.Nəbiyev qeyd edib.
