Rusiyaya məxsus hərbi təyyarə Baltik dənizində Almaniya Hərbi Dəniz Qüvvələrinə məxsus freqatın üzərindən uçub.
"Hafta.az" "Tagesspiegel” nəşrinə istinadla xəbər verir ki, bu barədə Almaniyanın müdafiə naziri Boris Pistorius danışıb.
O vurğulayıb ki, Rusiya pilotsuz təyyarələrinin və döyüş təyyarələrinin Estoniya və Polşanın hava məkanına daxil olması, eləcə də bir neçə gün ərzində alman freqatının üzərindən havada uçuşu “Rusiyanın öz sərhədlərini getdikcə daha çox, sözün əsl mənasında sınaqdan keçirdiyini açıq şəkildə nümayiş etdirir”.
Pistorius hadisənin dəqiq gününü və ya başqa təfərrüatları açıqlamayıb. Bununla belə, alman xəbər agentliyinin məlumatına görə, bu, iki dəfə baş verib - qısa müddət əvvəl və keçən həftə sonu.
Pistoriusun nəzərdə tutduğu gəmi NATO-nun sentyabrın 22-dən 26-na kimi keçirilən "Neptune Strike" təlimində iştirak edən “Hamburq” freqatıdır.
Pistorius vurğulayıb ki, Rusiya sözün əsl mənasında NATO ölkələrinin sərhədlərini getdikcə daha tez-tez və fəal şəkildə sınaqdan keçirir. Onun sözlərinə görə, hərbi dairələrdə bu cür uçuşlara lüzumsuz təxribat kimi baxılır.
“Putin bizi təxribata çəkmək istəyir, Putin NATO-ya üzv dövlətləri təxribat etmək istəyir”, - deyən nazir əlavə edib ki, Rusiya lideri həm də Alyansdakı iddia edilən zəiflikləri müəyyənləşdirmək, ifşa etmək və onlardan istifadə etmək istəyir.
