Ajans.az xəbər verir ki,bu bəyanat Trampın Rusiya ilə müharibə məsələsində əvvəlki mövqeyindən kəskin şəkildə fərqlənir. "Truth Social" platformasında paylaşdığı açıqlamada Tramp, Ukraynanın Avropa və NATO-nun dəstəyi, eləcə də Rusiyanın iqtisadi zəifliyi fonunda “bu müharibənin başladığı yerdən ilkin sərhədləri” bərpa edə biləcəyini vurğulayıb. O əlavə edib ki, Kiyev “bəlkə bundan da irəli gedə bilər”, lakin bu fikrin konkret nəyə işarə etdiyini açıqlamayıb. Trampın bu açıqlamaları onun BMT Baş Assambleyası çərçivəsində Nyu-Yorkda Ukrayna prezidenti Volodimir Zelenski ilə keçirdiyi görüşdən sonra səsləndirilib. O, həmçinin qeyd edib ki, “Ukrayna/Rusiya hərbi və iqtisadi vəziyyəti ilə tanış olduqdan və tam başa düşdükdən sonra” mövqeyini dəyişib. "Putin və Rusiya BÖYÜK iqtisadi sıxıntı içindədir və bu, Ukraynanın hərəkətə keçməsi üçün əla fürsətdir", – deyə Tramp bildirib və Rusiya rəhbərliyini “kağız pələng” adlandırıb. Tramp daha əvvəl müharibəni tez bir zamanda sona çatdırmaq niyyətində olduğunu bildirirdi, lakin bu, Ukraynanın bəzi ərazilərdən imtina etməsi ilə müşayiət oluna bilərdi. Prezident Zelenski isə bu yanaşmanı ardıcıl olaraq rədd etmişdi.
Zelenski Trampın mövqeyindəki dəyişiklikləri müsbət dəyərləndirib. BMT binasında jurnalistlərə açıqlamasında o bildirib ki, ABŞ-ın “müharibə bitdikdən sonra” Ukraynaya təhlükəsizlik zəmanətləri verməyə hazır olduğunu anlayır. O əlavə edib: “Mən yalan danışmaq istəmirəm, konkret təfərrüatlarımız yoxdur”, lakin daha çox silah, hava hücumundan müdafiə sistemləri və pilotsuz uçuş aparatlarının göndərilməsi ehtimalından danışıb. Qeyd edək ki, Tramp Krım məsələsinə və ya Rusiya tərəfindən ilhaq edilmiş digər ərazilərə konkret olaraq toxunmayıb. Rusiya 2014-cü ildə Krımı işğal etmiş, 2022-ci ildə isə Ukraynaya qarşı genişmiqyaslı müharibəyə başlamışdı.
