Taposiris Maqna məbədində aşkarlanan arxeoloji izlər alimlər arasında yeni müzakirələr doğurub...
Poliqon xəbər verir ki, “Kleopatranın son sirri” adlı yeni sənədli film məşhur Misir kraliçasının məzarının yerləşdiyi məkan ətrafında davam edən mübahisələri yenidən alovlandırıb. Live Science yazır ki, diqqət mərkəzində İsgəndəriyyə yaxınlığında yerləşən Taposiris Maqna məbədi ərazisində aparılan qazıntılar dayanır.
Arxeoloqlar burada VII Kleopatranın təsviri olan yüzlərlə bürünc sikkə, həmçinin qədim dövrdə dənizlə məbədi birləşdirən, lakin bu gün qismən su altında qalan limanın qalıqlarını aşkarlayıblar. Tədqiqatlara rəhbərlik edən arxeoloq Katlin Martinez iddia edir ki, Ptolemeylər sülaləsinin son hökmdarı məhz İsidə həsr olunmuş bu məbəd kompleksində dəfn edilmiş ola bilər.
Tapıntılar arasında diqqət çəkən əsas nümunələrdən biri məhz Kleopatranın təsvir olunduğu sikkələrdir. Onların 200-dən çoxu məbədin həyətində, 300-dən artıq nümunə isə giriş hissəsində, yüzlərlə digəri isə xüsusi ritual xəndəklərində aşkarlanıb. Martinezə görə, belə kütləvi yığım məbədin kult xarakterini və birbaşa Kleopatra ilə bağlılığını göstərir.
Daha bir mühüm kəşf qədim limanla bağlıdır. Buradan qaldırılan keramika qabları, daş və metal lövbərlər burada vaxtilə geniş dəniz həyatının mövcudluğunu sübut edir. Alimlər ehtimal edirlər ki, liman ətrafında gizli keçidlər və ya yeraltı otaqlar mövcud ola bilərdi ki, onlar da məhz kraliçanın dəfn yeri ilə əlaqədar ola bilər.
Bununla belə, skeptiklər xatırladırlar ki, antik mənbələrin heç birində Kleopatranın Taposiris Maqnada dəfn olunması barədə məlumat yoxdur. Klassik versiyaya görə, o, İsgəndəriyyədə, Marcus Antoni ilə birlikdə — artıq dənizin altında qalmış şəhər hissəsində torpağa tapşırılmış ola bilər.
Bütün bunlara rəğmən, Martinez və onun tərəfdarları hesab edirlər ki, məhz İsidə həsr olunmuş məbədin seçilməsi təsadüfi deyil. Çünki Kleopatra özünü tez-tez bu tanrıça ilə eyniləşdirirdi və məhz belə bir məkanda dəfn olunmağı istəmiş ola bilərdi.
Hazırda axtarışlar müasir texnologiyalar — kameralar və xüsusi avadanlıqlar vasitəsilə həm yeraltı tunellərdə, həm də su altında qalan sahələrdə davam etdirilir. Alimlər ümid edirlər ki, bəlkə də məhz bu araşdırmalar iki min ildən çoxdur ki, sirr olaraq qalan tarixi sualın cavabını açacaq.
Poliqon.info
