Budapeşt Rusiya neftindən imtina etməyəcək...
Macarıstan ABŞ-ın və şəxsən prezident Donald Trampın Rusiyadan enerji resurslarının alınmasının tam dayandırılması ilə bağlı tələblərini qəbul etməyib.
Poliqon xəbər verir ki, bu barədə ölkənin xarici işlər naziri Peter Siyyarto BMT Baş Assambleyasının kuluarlarında The Guardian qəzetinə verdiyi müsahibəsində bildirib.
Siyyartonun sözlərinə görə, Macarıstanın enerji təhlükəsizliyini təmin etmək Rusiya neft və qazından imtina etmədən mümkün deyil. O, açıq şəkildə bəyan edib:
“Biz ölkəmizə təhlükəsiz enerji təchizatını Rusiya nefti və ya qazı olmadan təmin edə bilmərik.”
Donald Tramp isə müttəfiqlərini Moskva ilə enerji əməkdaşlığını tamamilə dayandırmağa çağırıb. ABŞ prezidenti bildirib ki, yalnız bütün NATO ölkələri Rusiya nefti alımını dayandırdıqdan sonra Vaşinqton Moskva əleyhinə yeni və daha sərt sanksiyalar tətbiq edəcək:
“Mən Rusiyaya qarşı böyük sanksiyalar tətbiq etməyə hazıram, amma bu yalnız o halda baş verəcək ki, bütün NATO ölkələri eyni addımı atsın və Rusiya nefti almağı dayandırsın.”
Trampın bu çağırışları Moskvanın Ukraynaya qarşı müharibəni dayandırması ilə bağlı ardıcıl ultimatumlarla üst-üstə düşür. Lakin NATO daxilində bəzi ölkələr Vaşinqtonun həqiqətən də Vladimir Putinə qarşı təzyiqi artırmaq niyyətində olub-olmadığına şübhə ilə yanaşır.
Hazırda dövlət şirkəti MOL hər il təxminən 5 milyon ton xam nefti “Drujba” kəməri vasitəsilə idxal edir. Bu kəmərdən əsas faydalanan ölkələr Macarıstan və Slovakiyadır. Onlar Avropa İttifaqının Rusiya enerji daşıyıcılarından imtina tələblərinə qarşı çıxan əsas tərəflərdir.
Macarıstanın baş naziri Viktor Orban isə Avropada Donald Trampın ən yaxın müttəfiqlərindən biri kimi tanınır. O, Ukraynanı açıq şəkildə tənqid edir və Kremlin siyasəti ilə işgüzar münasibətləri davam etdirir. Orbana görə, Budapeşt üçün prioritet Avropa siyasi kursundan daha çox, ölkənin daxili sabitliyi və enerji təminatıdır.
Beləliklə, Macarıstanın mövqeyi göstərir ki, Aİ və ABŞ daxilində Rusiya ilə münasibətlərə dair yekdil yanaşma formalaşmayıb. Budapeşt enerji təhlükəsizliyini riskə atmaqdan imtina edir və bu mövqe yaxın perspektivdə dəyişməyə oxşamır.
Poliqon.info
