Baş nazir erməni xalqını xəyali torpaq iddialarından uzaqlaşdırmağa, real dünya ilə barışdırmağa çalışan yeganə liderdir
Ermənistanın Baş naziri Nikol Paşinyan uşaqların Ağrı dağının coğrafi yerləşməsinə təəccüblənməsi ilə bağlı hekayə danışıb. Baş nazir deyib ki, tonqal yanında olan bir qrup uşağa yaxınlaşaraq onlardan Ermənistanın ən hündür dağının adını soruşub: "Uşaqların 70 faizi Ararat (əsl adı: Ağrı dağı) deyə cavab verib. Onlar hətta Araratın Ermənistanda olmadığını bilmirlər.
Hətta bizimlə ünsiyyətdə olan bir çox ermənilər də bunu bilmirlər, çünki biz belə danışırıq". Paşinyan vurğulayıb ki, Araratın Türkiyədə yerləşməsi barədə məlumatsızlıq hətta böyüklər arasında da geniş yayılıb: "Sonra öyrənirlər, təəccüblənirlər, necə yəni Ararat Ermənistan Respublikasının ərazisində deyil? Onlar bizim haqqımızda nə düşünürlər?". Qeyd edək ki, sentyabrın 17-də Ermənistanın xüsusi tapşırıqlar üzrə keçmiş səfiri Edmon Marukyan hazırkı hakimiyyətin qərarı ilə Ağrı dağının Ermənistanın dövlət gerbindən çıxarılmasının mümkünlüyünü açıqlayıb.
Vətəndaş Həmrəyliyi Partiyasının sədr müavini Samir Əsədli Sherg.az-adeyib ki, bu epizod bir daha sübut edir ki, Ermənistan cəmiyyətində onilliklər boyu utopik xəyallar və simvolik təsəvvürlər hakim olub. Ekspertin sözlərinə görə, reallıqla təbliğat arasındakı uçurum isə artıq gənc nəslin düşüncəsinə də sirayət edib:
"Paşinyanın bu açıqlaması həm də onun siyasi kursunu göstərir. Baş nazir erməni xalqını xəyali torpaq iddialarından uzaqlaşdırmağa, real dünya ilə barışdırmağa çalışan yeganə liderdir. Baş nazir anlayır ki, qonşularla sülh olmadan nə iqtisadi inkişaf, nə də ictimai sabitlik mümkündür. Ermənistanın gələcəyi məhz bu reallığı dərk etməkdən keçir: - sülh, əməkdaşlıq və tərəqqi yolundan. Bu fakt bir daha göstərir ki, Paşinyan Ermənistanı qurtaracaq və erməni xalqını utopik xəyallardan uzaqlaşdıracaq yeganə liderdir. O, qonşularla sülh istəyir və yaxşı anlayır ki, inkişaf və tərəqqinin tək mənbəyi sülhdür".
