Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin (DMA) “PeşəFest-2025” festivalı növbəti dəfə Tovuz rayonunda keçirilib.
QHT.az xəbər verir ki, “Peşə öyrən, gələcəyini qur!” devizi ilə təşkil edilən festival gənclərin və şagirdlərin peşə seçiminə dəstək olmaq, onların karyera istiqamətində doğru addım atmalarını təmin etmək məqsədi daşıyır.
Tədbirdə Tovuz Rayon İcra Hakimiyyətinin (RİH) başçısı Məmməd Məmmədov, millət vəkili Nizami Səfərov, DMA-nın İdarə Heyətinin sədri Sadiq Əliyev, ətraf rayonlardan dövlət və özəl təşkilatların təmsilçiləri və ictimaiyyət nümayəndələri iştirak ediblər.
Tovuz RİH başçısı M.Məmmədov rayonun yeniyetmə və gənclərinin peşələrə marağının artırılmasında və əmək bazarının tələblərinə uyğun peşə seçimi etmələrində “PeşəFest”in rolunu yüksək qiymətləndirib.
Millət vəkili N.Səfərov gənclərin uğurlu karyera qurmalarında, müasir peşələr barədə dolğun məlumat almalarında və onlarda əyani təsəvvürün formalaşmasında “PeşəFest”in xüsusi rolu olduğunu qeyd edib.
DMA-nın sədri S.Əliyev çıxış edərək “PeşəFest”in ölkənin 11 iqtisadi rayonunu əhatə edən interaktiv karyera yönümlü layihə olduğunu, festivalın gənclərə və yeniyetmələrə müxtəlif peşələri tanıtmağa, onlara peşə seçimində dəstək olmağa xidmət etdiyini bildirib.
Sonra peşəkarlar öz ixtisaslarına uyğun təqdimatlarla çıxış edib, təmsil etdikləri peşələrin xüsusiyyətlərini diqqətə çatdırıblar. Onlar festival iştirakçılarına peşə seçimi ilə bağlı öz tövsiyələrini bölüşüblər.
Festivalın təşkil olunacağı digər ünvanlar və tarixlər isə belədir:
• Göygöl – 24 sentyabr / Heydər Əliyev parkı
• Ağdam – 29 sentyabr / Quzanlı Heydər Əliyev Mərkəzi
• İmişli – 1 oktyabr / Heydər Əliyev parkı
• Ağsu – 3 oktyabr / Heydər Əliyev parkı
• Ağdaş – 8 oktyabr / Heydər Əliyev parkı
• Qəbələ – 11 oktyabr / Heydər Əliyev parkı
• Xaçmaz – 13 oktyabr / Zəfər parkı
• Bakı – 16 oktyabr / Dənizkənarı Milli Park
Festivalda 14 peşə (kibertəhlükəsizlik, data analitika, helpdesk, 3D animator, zinət əşyalarının dizayneri, turizm təşkilatçısı, dülgər, avtomobil təmiri üzrə çilingər, qida mühəndisi, qənnadıçı, xilasedici, barista, diş texniki və baytar) üzrə maarifləndirici tədbirlər təşkil olunur.
İştirakçılar festivala qatılmaqla bu peşə sahələri üzrə inkişaf etməyin yolları, tələb olunan bacarıqlar, ixtisas seçimi barədə faydalı məlumatlar əldə etmək, mütəxəssislərlə ünsiyyət qurmaq imkanı qazanırlar.
