BAKI, 20 sentyabr. TELEQRAF
Atom Enerjisi üzrə Beynəlxalq Agentlik (AEBA) ilk dəfə "Formula 1" üzrə Azərbaycan Qran-prisi"ndə nüvə təhlükəsizliyinə dəstək verir.
Teleqraf xəbər verir ki, daha əvvəl Azərbaycan paytaxtına AEBA ekspertləri səfər edib.
Onlar Fransa və BƏƏ-dən olan mütəxəssislərlə birlikdə tədbir təşkilatçılarına məsləhətlər verib və 100-dən çox radiasiya nəzarəti cihazının istifadəsini müzakirə ediblər.
"Böyük tədbirlər nüvə və digər radioaktiv materiallardan potensial istifadə edənlər də daxil olmaqla, cinayətkarlar üçün əsas hədəflərdir. Nüvə təhlükəsizliyi dəstəyimizi sürətli avtomobil idmanı dünyasına artıraraq, sayıqlıq zonamızı genişləndiririk, ölkələrə kritik boşluqları bağlamağa və əhalinin təhlükəsizliyini təmin etməyə kömək edirik", - AEBA-nın baş direktoru Rafael Qrossi vurğulayıb.
AEBA-nın Nüvə Təhlükəsizliyi Departamentinin direktoru Yelena Buqlova agentliyin sistemli iş gördüyünü xatırladıb: “Son iki onillik ərzində AEBA kütləvi tədbirlərin ənənəvi müdafiə tədbirlərinə nüvə təhlükəsizliyi protokollarının inteqrasiyasında ön sıralarda olub - bu səylər milyonlarla insanın təhlükəsizliyini təmin edir. "Formula 1" yarışları kimi tədbirlərin pərdə arxasında, nüvə təhlükəsizliyini tədbirlərdən əvvəl və onların gedişatı zamanı ümumi tədbirlər kompleksinin fundamental hissəsi kimi tanıyan ardıcıl yanaşma mövcuddur”.
AEBA daha əvvəl BMT-nin İqlim Dəyişikliyi Konfransında (COP29) Azərbaycanı dəstəkləyib, noyabrda keçiriləcək MDB Oyunları və 2026-cı ildə Ümumdünya Şəhər Forumu zamanı ölkə ilə əməkdaşlığı davam etdirəcək. Agentlik 2004-cü ildən bəri 49 ölkədə 88 əsas tədbirin nüvə təhlükəsizliyinin təmin edilməsinə köməklik göstərib, 2023-cü ildə isə Avstriyanın Zaysbersdorf şəhərində Nüvə Təhlükəsizliyi Təlim və Nümayiş Mərkəzi açılıb.
