- Ночной Режим
- Домашняя страница
- Статистика
- Источники
- Рейтинг
- Погода
- Валюта
Kürdəmirdə toy məclisi davaya çevrildi: Bəyin qardaşı xəsarət aldı— TƏFƏRRÜAT
Demokrat.az-ın əldə etdiyi xəbərə görə, hadisə rayonun Şıxımlı kəndi ərazisində yerləşən ictimai yer hesab edilən “Dan ulduzu” şadlıq sarayında baş verib.
Orada keçirilən toy məclisi zamanı heç-bir əsaslı səbəb olmadan həmin kəndin sakini, 1973-cü il təvəllüdlü İntiqam toyda iştirak edən Qismətin ünvanına nalayiq söyüşlər söyüb, üzərinə hücum edib. Onun üz və baş nahiyələrinə yumruqla qəsdən bir neçə dəfə vurub.
Hadisəni törədən İntiqamın barəsində Cinayət Məcəlləsinin 221.1-ci (xuliqanlıq, yəni ictimai qaydanı kobud surətdə pozan, cəmiyyətə açıqca hörmətsizlik ifadə edən, şəxslər üzərində zor tətbiq olunması ilə və ya belə zorun tətbiq edilməsi hədəsi ilə, habelə özgənin əmlakının məhv edilməsi, yaxud zədələnməsi ilə müşayiət edilən qərəzli hərəkətlər) maddəsi ilə ittiham elan edilib.
İş üzrə izahat verən İntiqam ona elan olunmuş ittiham üzrə özünü təqsirli bilib. O, ifadəsində göstərib ki, ailəsi ilə birlikdə Kürdəmir rayonu Şıxımlı kəndində yaşayır: “Əvvəllər cinayət törətməyə görə məhkumluğum olmayıb, heç kimlə ədavətim və düşmənçiliyim yoxdur.
Hadisə günü, saat 18 radələrində kənd ərazisində yerləşən “Dan Ulduzu” şadlıq sarayında qohumum Əfqanın qızının toy məclisi keçirildi. Əfqan tanımadığım Salyan rayon Qarabağlı kənd sakini ilə qohum olub. Həmin toy məclisində iştirak etdim, yemək yeyərkən spirtli içki qəbul etdim. Əfqanın yeni qohum olduğu şəxslər də toyda iştirak ediblər. Toy məclisi zamanı saat 20 radələrində Salyandan gələn qonaqlardan bir nəfəri musiqiçilərlə mahnı sifarişi üstündə sözlü mübahisə etməyə başladı. Əfqan da həmin şəxsi sakitləşdirmək istəyərkən, onların yanına getdim. Dava olduğunu görərək mən də mübahisə edənlərin yanına getdim. Dava sırasında vurularaq yerə yıxıldım. Bundan sonra olan hadisələri isə xatırlamıram”.
İş üzrə zərərçəkmiş Qismətin sözlərinə görə, hadisə günü saat 17:00-da qardaşının Kürdəmir rayonunun Şıxımlı kəndi ərazisində yerləşən “Dan ulduzu” şadlıq sarayında toy məclisi başladı. Məclis normal axarında davam etdi. Salyan rayonundan da oraya qonaqlar gəlmişdilər. Daha sonra saat təxminən 20 radələrində bilmədiyim səbəblərdən məclisdə iştirak edən bir qrup şəxs arasında dava düşdü. Mən də davanı sakitləşdirmək üçün onların yanına getdim. Bu zaman bir nəfər şəxs su butulkası ilə baş nahiyəmdən vurdu. Vuran adamı görməmişəm, kim olduğunu bilmirəm. Mən isə masanın üstündə olan salfetkanı başına qoydum və oradan Kürdəmir rayon xəstəxanasına getdim. Xəstəxanada mənə tibbi yardım olundu. Şadlıq sarayında olan dava-dalaş təxminən 20-25 dəqiqə davam etdi.
Hadisə nəticəsində toy məclisi dağıldı”.
Bu cinayət işinə Kürdəmir Rayon Məhkəməsində baxılıb. Məhkəmənin hökmü ilə İntiqama 8 ay 26 gün müddətə azadlığın məhdudlaşdırılması cəzası təyin olunub.
Təqsirləndirilən şəxsin üzərinə yaşayış yeri olan Kürdəmir rayonu Şıxımlı kəndində yerləşən evini cəza müddətində axşam saat 23:00-dan səhər saat 07:00-dək tərk etməsi qadağan olunub.
Bundan əlavə ona bu müddət ərzində elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək tapşırılıb.
Təqsirləndirilən şəxsə cəza müddətində Kürdəmir rayonunun ərazi hüdüdlarını tərk etməsi qadağan edilib. Onun müvafiq məhkəmə qərarı olmadan yaşayış yerini dəyişdirməmək, habelə cəzanın icrasına nəzarət edən orqanı iş və ya təhsil yerinin dəyişdirilməsi barədə əvvəlcədən məlumatlandırmaq vəzifələri qoyulub.
Üzərinə qoyulmuş vəzifələrin yerinə yetirməsinə nəzarətin həyata keçirilməsi yaşayış yeri üzrə Kürdəmir rayon icra və probasiya şöbəsinə həvalə edilib.
Fariz Məlikli
Demokrat.az
