Prezident İlham Əliyev 2023-cü il oktyabrın 15-də xalqımızın yaddaşına qızıl hərflərlə yazılacaq daha bir tarixi addım atdı
Azərbaycanın tarixi torpaqları olan Xankəndi, Xocalı, Xocavənd və Ağdərə şəhərlərinin azad edilməsi təkcə hərbi və siyasi deyil, həm də mənəvi bir qələbə kimi tarixə düşmüşdür. 2024-cü il sentyabrın 18-də Prezident İlham Əliyevin imzaladığı Sərəncama əsasən, hər il sentyabrın 20-si "Xankəndi, Xocalı, Xocavənd və Ağdərə Günü" kimi təntənəli şəkildə qeyd olunur. Bu gün təkcə bu şəhərlərin azad edilməsi deyil, həm də Azərbaycanın suverenliyinin tam bərpası anlamına gəlir.
Ermənistanın Azərbaycana qarşı 1988-ci ildən başlayan ərazi iddiaları və hərbi təcavüzü nəticəsində, Dağlıq Qarabağ və ətraf rayonlar uzun müddət işğal altında qaldı. Xankəndi, Xocalı, Xocavənd və Ağdərə şəhərləri də bu işğalın mərkəzində idi. Xüsusilə Xocalı soyqırımı 1992-ci ilin fevralında dünya tarixində bəşəriyyətə qarşı törədilmiş ən dəhşətli cinayətlərdən biri kimi yadda qaldı. Minlərlə azərbaycanlı vətəndaş öz yurd-yuvasından didərgin salındı, onlarla şəhər və kənd dağıdıldı.
2020-ci ilin payızında baş vermiş 44 günlük Vətən Müharibəsi nəticəsində Azərbaycan Ordusu işğal altındakı ərazilərin böyük hissəsini azad etdi. Lakin Xankəndi və digər bir neçə bölgə müvəqqəti olaraq Rusiya sülhməramlı qüvvələrinin nəzarətində qaldı. 2023-cü ilin sentyabrında isə həyata keçirilən lokal antiterror tədbirləri nəticəsində, bölgədə fəaliyyət göstərən qanunsuz erməni silahlı birləşmələri tam tərksilah edildi və Azərbaycan öz suverenliyini bütün Qarabağ ərazisində bərpa etdi. Bu hadisə ilə birlikdə Xankəndi, Xocalı, Xocavənd və Ağdərə də nəhayət Azərbaycana tam şəkildə qovuşdu.
Bu tarixi günün qeyd olunması bir neçə mühüm aspektə malikdir. Belə ki, tarixi ədalətin bərpası – 30 il ərzində xalqımız bu torpaqlara qayıdacağı günü gözlədi. Bu gün həmin ədalətin təntənəsidir. Müstəqilliyin möhkəmləndirilməsi – Bu şəhərlərin azad olunması və dövlət bayrağımızın dalğalanması Azərbaycanın ərazi bütövlüyünün rəsmi və praktiki bərpasıdır. Milli həmrəyliyin simvolu – Hər bir azərbaycanlının qəlbində bu gün xüsusi yer tutur. Çünki bu zəfər ordunun, dövlətin və xalqın birliyinin məhsuludur. Gələcəyə baxış – Bu gün həm də azad edilmiş ərazilərdə yenidənqurma və bərpa işlərinin, yeni həyatın başlanğıcını simvolizə edir. Bu əlamətdar gün, eyni zamanda, Qarabağ uğrunda şəhid olan minlərlə igidimizin ruhuna ehtiram günüdür. Xocalıda, Ağdərədə, Xocavənddə və Xankəndidə canını fəda etmiş qəhrəmanlarımızın xatirəsi hər zaman xalqımızın yaddaşında yaşayacaq. Onların göstərdiyi fədakarlıq nəticəsində bu torpaqlar geri qaytarıldı və tarix yenidən yazıldı.
Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev 2023-cü il oktyabrın 15-də xalqımızın yaddaşına qızıl hərflərlə yazılacaq daha bir tarixi addım atdı: Xankəndi, Xocalı, Xocavənd və Ağdərə şəhərlərində Azərbaycan Respublikasının Dövlət Bayrağını ucaltdı. Bu hadisə yalnız Azərbaycanın suverenliyinin tam bərpası ilə deyil, həm də milli qürur və zəfərin təntənəsi ilə tarixə düşdü. “Bu gün tarixi bir gündür. Bu gün Xankəndi şəhərinin mərkəzi meydanında Azərbaycan Bayrağı qaldırıldı. Bu münasibətlə bütün Azərbaycan xalqını ürəkdən təbrik edirəm.
Düz 20 il bundan əvvəl Azərbaycan xalqı mənə böyük etimad göstərərək prezident seçkilərində prezident vəzifəsinə seçmişdir. O vaxt doğma xalqıma müraciət edərək söz vermişdim ki, Azərbaycan xalqının və Azərbaycan dövlətinin milli maraqlarını müdafiə edəcəyəm, Azərbaycanın ərazi bütövlüyünü qoruyacağam. Konstitusiyaya və “Qurani-Kərim”ə əl basaraq and içmişdim. Şadam ki, son 20 il ərzində verdiyim bütün vədlər, qarşıma qoyduğum bütün vəzifələr icra edildi.
Bu gün bütün Azərbaycan xalqı ürəkdən sevinir, bütün Azərbaycan xalqı “Allaha şükür” deyir. Bu günü biz 30 ildən çox gözləmişdik. Ancaq hər birimiz, əminəm və inanırdıq ki, bu gün gələcək.
İyirmi il bundan əvvəl Prezident kimi öz vəzifə borcumu yerinə yetirməyə başlayanda qarşıma bir nömrəli vəzifə qoymuşdum ki, Azərbaycan Bayrağı o vaxt işğal altında olan bütün ərazilərdə, bütün torpaqlarda, bütün şəhər və kəndlərdə qaldırılsın. Hər gün, hər saat biz bu müqəddəs məqsədə doğru gedirdik. Hər gün biz bu müqəddəs anı yaxınlaşdırırdıq və dəfələrlə deyirdim ki, hər birimiz, hərə öz yerində öz işi ilə bu günü yaxınlaşdırmalıdır” – deyə Prezident İlham Əliyev çıxışında bildirib. Bu bayraqlar altında Qarabağda artıq yenidənqurma və dinc həyat başlayır. Dövlət başçısının rəhbərliyi ilə azad edilmiş ərazilərdə yollar, məktəblər, xəstəxanalar, yaşayış kompleksləri tikilir, köçkünlərin qayıdışı həyata keçirilir. Artıq Xankəndidə və digər şəhərlərdə dövlət idarəetmə strukturları fəaliyyətə başlayıb, inzibati və sosial infrastruktur qurulmaqdadır.
2023-cü il oktyabrın 15-də Prezident İlham Əliyevin Xankəndi, Xocalı, Xocavənd və Ağdərədə Dövlət Bayrağımızı ucaltdığı gün – tariximizin ən şanlı səhifələrindən biri olaraq qalacaq. Bu hadisə təkcə hərbi və siyasi qələbə deyil, həm də milli birliyin, xalq-dövlət vəhdətinin və sarsılmaz iradənin təntənəsidir.
Azərbaycan xalqı bu günü heç vaxt unutmayacaq. Bu, təkcə bir dövlət başçısının yox, bütöv bir xalqın qürurla ucaltdığı bayraq günüdür. Bu bayraqlar təkcə bir dövlət simvolu deyil, 30 illik mübarizənin, şəhidlərin qanı ilə sulanmış torpaqların, itirilmiş və sonra geri qaytarılmış yurdların simvolu idi. Bayrağın bu şəhərlərdə dalğalanması, bir dövlətin öz torpaqlarına sahib çıxmasının açıq və rəsmi bəyanatı idi.
"Xankəndi, Xocalı, Xocavənd və Ağdərə Günü" sadəcə təqvimdə bir gün deyil. Bu gün, Azərbaycan xalqının əsrlər boyu davam edən mübarizəsinin, müstəqillik və ərazi bütövlüyü uğrunda verdiyi mücadilənin ən parlaq səhifələrindən biridir. Bu tarix bizə həm dərsdir, həm də gələcək nəsillərə örnək olacaq bir iftixar mənbəyidir. Bu əlamətdar günün qeyd olunması Azərbaycanın tarixi zəfərinin, milli birliyinin və əbədi suverenliyinin rəmzinə çevrilmişdir.
Səyavuş Qasımov
Avrasiya Universitetinin rektoru,
siyasi elmlər üzrə fəlsəfə doktoru, dosent
