Hamiləlik zamanı təkcə qarın böyümür – bədən bir çox dəyişikliklərə məruz qalır. Səhər ürəkbulanması, əhval dəyişiklikləri və digər simptomlarla yanaşı, dəri və dodaq quruluğu da geniş yayılmış problemlərdəndir.
Pravda.az bildirir ki, bu hal, hamiləliyin ilk trimestrində başlayaraq bəzi qadınlarda doğuma qədər davam edə bilər.
Əsas səbəblər:
Susuzluq: Hamiləlikdə bədən daha çox suya ehtiyac duyur. Yetərincə maye qəbul edilmədikdə dəri və dodaqlarda quruluq yaranır. Qusma və ishal kimi hallar da susuzluğa səbəb ola bilər.
Artan qan həcmi: Böyrəklərin çox işləməsi tez-tez sidiyə getməyə səbəb olur və bu da orqanizmdəki su miqdarını azaldır.
Ödəm (şişkinlik): Artan vazopressin hormonu su tutulmasına və dərinin gərginləşərək qurumasına səbəb olur.
Bədən dəyişiklikləri: Bədənin böyüməsi və dərinin dartılması, elastikliyi və nəmini itirməsinə gətirib çıxarır.
Nə zaman həkimə müraciət etməli?
Dəridə ciddi qaşınma, narahatlıq və davamlı ishal-qusma hallarında mütləq həkimə müraciət edilməlidir. Bu hallar gestasion diabet və ya qaraciyər pozuntusu olan kolestaz kimi ciddi problemlərə işarə edə bilər.
Nə etməli?
Gündə 12 stəkan su içmək tövsiyə olunur.
Su ilə zəngin qidalar (xiyar, qarpız) istehlak edin.
Yumşaq dəsmalla dərini qurutmaq və uyğun nəmləndirici istifadə etmək vacibdir.
Təbii yağlar (kakao, hindqozu yağı) ehtiva edən vasitələr faydalıdır.
Geyimdə pambıq materiallara üstünlük verin, günəşdən qorunun.
Əminə Bayramova
