Diri-diri basdırılan körpə həyat uğrunda mübarizə aparır
Ajans.az BCC-ə istinadən xəbər verir ki,körpə hazırda Şahcahanpur şəhərindəki Dövlət Tibb Kollecinin neonatal reanimasiya şöbəsində müalicə olunur. Hadisə kənd sakinlərindən birinin təsadüfən torpaq təpəsinin altından zəif qışqırıqlar eşitməsi ilə üzə çıxıb. Keçilərini otarmağa çıxmış çoban yaxınlaşaraq palçığın içindən çıxan kiçik bir əl görüb. O, dərhal kəndliləri xəbərdar edib və polis çağırılıb. Əraziyə gələn hüquq-mühafizə orqanları körpəni torpaq altından çıxarıb. Tibb kollecinin direktoru Dr. Rajeş Kumar bildirib ki, körpə xəstəxanaya bazar ertəsi çatdırılıb və vəziyyəti son dərəcə ağır olub: "Palçıq ağzına və burun dəliklərinə dolmuşdu. Nəfəs ala bilmirdi. O, hipoksiya – oksigen çatışmazlığı – əlamətləri göstərirdi. Və bədənində böcəklər və heyvanların dişləmələri müşahidə olunurdu". Dr. Kumar əlavə edib ki, ilk 24 saatda vəziyyəti bir qədər sabitləşsə də, sonradan pisləşib və infeksiyaya yoluxub. Onun sözlərinə görə, körpənin yaraları təzə olduğuna görə ehtimal olunur ki, dəfn olunduqdan dərhal sonra tapılıb. Hazırda plastikan cərrah daxil olmaqla bir neçə həkimdən ibarət briqada körpəyə qulluq edir və infeksiyanın yayılmasının qarşısını almağa çalışır. "Proqnoz ağırdır, lakin biz onu xilas etmək üçün əlimizdən gələni edirik", – deyə Kumar vurğulayıb. Şahcahanpur polisi körpənin valideynlərini müəyyən etmək üçün axtarışlar aparır, lakin indiyədək nəticə əldə olunmayıb. Məsələ barədə əyalət üzrə uşaq qaynar xəttinə məlumat verilib. Bu hadisə Hindistanda qız uşaqlarına qarşı ayrı-seçkiliyin acı nəticələrindən biri kimi qiymətləndirilir. Ekspertlər bildirirlər ki, cinsə görə selektiv abortlar və doğulduqdan sonra qız uşaqlarının tərk edilməsi ölkənin əyrilənmiş cinsiyyət nisbətinin əsas səbəblərindəndir. Qız uşaqları Hindistanda, xüsusilə yoxsul icmalarda tez-tez maliyyə yükü kimi görülür. Kampaniyaçılar qeyd edirlər ki, ənənəvi olaraq oğlanlara üstünlük verilməsi milyonlarla qız uşağının abort və ya doğuşdan sonra öldürülməsi ilə nəticələnib. Xatırladaq ki, 2019-cu ildə də oxşar hadisə baş vermişdi – vaxtından əvvəl doğulmuş körpə gil qabın içində basdırılmış vəziyyətdə tapılmış və həftələrlə xəstəxanada qaldıqdan sonra sağaldılmışdı.
