Polşa-Belarus sərhədində elektron şlaqbaumun tikintisi bitib.
Bakıvaxtı.az "The Guardian"a istinadən xəbər verir ki, bu barədə Polşa Sərhəd Mühafizəsinin mətbuat xidməti məlumat yayıb.
Məlumata görə, Belarusla dövlət sərhədinin bütün 400 kilometrlik hissəsi boyunca fəaliyyət göstərən elektron maneə formasında dövlət sərhədinin mühafizəsi sisteminin inkişafının nəticələri ümumiləşdirilib.
Polşanın Belarusla həmsərhəd olan Podlaskie və Lyublin voyevodalıqlarında sərhədin quru və su hissələrinin elektron hasarlarının tikintisinə ümumi investisiya təxminən 136,6 milyon dollar təşkil edib.
Bir hissəsi Avropa İttifaqı tərəfindən ayrılan vəsait monitorinq postlarının yaradılmasına, 24 saatlıq müşahidə kameralarının, termal kameraların, daxil olan həyəcan siqnallarının təsnifatı üçün süni intellekt mexanizmi ilə obyektlərin müxtəlif fiziki xüsusiyyətlərinin qeydə alınması üçün sensorların quraşdırılmasına sərf edilib.
Gülşən Şərif
